Shqipëria ka regjistruar një fluks të lartë hyrjesh dhe daljeje gjatë muajit shtator 2025, duke reflektuar një aktivitet të shtuar pas sezonit veror.
Sipas të dhënave zyrtare të INSTAT, në vend kanë hyrë rreth 1.96 milionë shtetas shqiptarë dhe të huaj, që përfaqësojnë një rritje prej 9.5% krahasuar me shtatorin e një viti më parë. Ndërkohë, daljet nga territori shqiptarkanë arritur në 2.1 milionë persona, me një rritje prej 10.4% në raport me shtatorin 2024.
Hyrjet e shqiptarëve gjatë këtij muaji kanë qenë rreth 705 mijë, me një rritje vjetore prej 8.9%, ndërsa daljet kanë arritur në 772 mijë, duke shënuar një rritje prej 10.7%.
Në të njëjtën periudhë, 1.25 milionë të huaj kanë hyrë në Shqipëri – 9.9% më shumë se një vit më parë. Sipas INSTAT, 95% e vizitorëve të huaj vijnë nga Europa, ku kryeson Europa Jugore me 69% të totalit, e ndjekur nga Europa Perëndimore (12%) dhe Europa Qendrore e Lindore (11%).
Në total, gjatë periudhës janar–shtator 2025, janë regjistruar 10.2 milionë hyrje të të huajve, duke reflektuar një rritje të përgjithshme prej 7.1%. Të dhënat tregojnë se lëvizshmëria ndërkufitare po rritet ndjeshëm, jo vetëm për arsye turistike, por edhe për motive ekonomike dhe migratore.
Pjesa dërrmuese e vizitorëve, 98%, kanë hyrë në Shqipëri për arsye personale – pushime, vizita familjare apo turizëm. Megjithatë, është vënë re një rritje me 15.3% e hyrjeve për arsye biznesi dhe profesionale, çka tregon për zgjerim të bashkëpunimeve ekonomike dhe interes të qëndrueshëm për tregun shqiptar.
