Skitë, teleferikët dhe shpatet e bardha me borë gjatë Krishtlindjeve nuk janë më një siguri.
Sipas focus.it, deri në vitin 2100 kriza klimatike pritet të shkurtojë ndjeshëm sezonet e skijimit, duke rritur njëkohësisht kostot mjedisore dhe ekonomike të këtij aktiviteti.
Shkencëtarët kanë analizuar të dhëna nga zona Andermatt-Sedrun-Disentis, resorti më i madh i skijimit në Zvicër, i cili përfshin rreth 100 kilometra shpate.
Prodhimi artificial i borës varet nga kushte specifike klimatike, veçanërisht nga temperatura dhe lagështia e ajrit. Sa më i ftohtë dhe më i thatë të jetë ajri, si dhe sa më i ftohtë të jetë uji i përdorur, aq më efikas është procesi i krijimit të borës artificiale.
Me rritjen e temperaturave dhe shtimin e lagështisë, ky proces bëhet gjithnjë e më pak i leverdishëm nga ana ekonomike.
Një tjetër sfidë e madhe lidhet me furnizimin me ujë. Aktualisht, zona në studim përdor ujë nga liqeni Oberalpsee, në kantonin Uri, i cili siguron deri në 200 milionë litra ujë në vit për prodhimin e borës artificiale.
Por i njëjti liqen shërben edhe për prodhimin e energjisë hidroelektrike. Kjo situatë, ashtu si në shumë zona të tjera, krijon një konflikt mes përdorimeve të ndryshme të burimeve ujore, të cilat rrezikojnë të zvogëlohen gjithnjë e më shumë si pasojë e ndryshimeve klimatike. /skyweb.al
