Autoriteti Kombëtar i Ushqimit (AKU) ka ndërhyrë për të bllokuar një sasi të konsiderueshme prej 1200 kilogramësh të produktit “Red Forest Fruit Cake”, një pluhur me shije frutash i përdorur për përgatitjen e ëmbëlsirave në vend, pas një paralajmërimi të ardhur nga sistemi europian i alarmit për sigurinë ushqimore, RASFF.
Sipas njoftimit zyrtar, alarmi është ngritur nga autoritetet greke, të cilat kanë zbuluar në këtë produkt praninë e pigmentit të ndaluar “e kuqe reaktive 141”, një substancë sintetike që zakonisht përdoret për ngjyrosjen e tekstileve, veçanërisht pambukut dhe fibrave natyrale. Ky pigment është rreptësisht i ndaluar për përdorim në ushqime apo produkte kozmetike, për shkak të rrezikut potencial serioz që paraqet për shëndetin e njeriut.
Nga hetimet dhe kontrollet e kryera nga inspektorët e AKU, është arritur të bllokohet një sasi prej 365 kg e këtij pluhuri, e cila tashmë është dërguar për asgjësim. Megjithatë, pjesa tjetër prej 835 kg rezulton të jetë shpërndarë dhe konsumuar tashmë në treg.
“AKU, pas kryerjes së kontrolleve dhe ndjekjes së gjurmueshmërisë, ka bllokuar sasinë e gjetur në subjekte të produktit ‘Red Forest Fruit Cake’, me destinacion asgjësimin”, thuhet në deklaratën e Autoritetit.
Ky rast ngre edhe një herë shqetësimin për sigurinë ushqimore dhe efektivitetin e mekanizmave të kontrollit për produktet e importuara në Shqipëri, veçanërisht për produktet që kalojnë përmes zinxhirëve ndërkombëtarë të shpërndarjes. Autoritetet bëjnë apel për vigjilencë të shtuar nga operatorët ekonomikë dhe qytetarët për identifikimin dhe raportimin e produkteve të dyshimta në treg. /skyweb.al
