Çmimet e naftës shënuan rënie të fortë në nisje të javës, pasi sinjalet për një ulje të tensioneve mes Iranit dhe Shteteve të Bashkuara qetësuan tregjet ndërkombëtare.
Nafta Brent, standardi global i referencës, ra me rreth 6%, duke u tregtuar pranë nivelit të 90.8 dollarëve për fuçi. Edhe nafta bruto amerikane pësoi një rënie prej më shumë se 5.5%, duke zbritur në afërsisht 84 dollarë për fuçi.
Lëvizja erdhi pasi Irani deklaroi se është i gatshëm të ndalojë sulmet, për sa kohë që edhe Shtetet e Bashkuara pezullojnë operacionet e tyre ushtarake. Sipas Reuters, një zyrtar i lartë iranian tha se qëndrimi i Teheranit bazohet në parimin “sulm për sulm”, duke theksuar se ndërprerja e sulmeve nga SHBA do të pasohej nga ndalimi i operacioneve iraniane. Ky mesazh, sipas të njëjtit burim, i është përcjellë tashmë Uashingtonit.
Zhvillimet pasojnë vendimin e administratës së presidentit Donald Trump për të pezulluar fushatën e bombardimeve. Reuters raportoi se këshilltarët e presidentit argumentuan se ushtria amerikane kishte arritur shumicën e objektivave të saj, ndërsa u ngritën edhe shqetësime për pakësimin e rezervave të armëve. Ndërkohë, ambasadori amerikan në Kombet e Bashkuara, Mike Waltz, deklaroi se vendimi për ndërprerjen e sulmeve synon t’i japë më shumë hapësirë përpjekjeve diplomatike.
Megjithatë, analistët vlerësojnë se luhatjet e fundit në tregun e energjisë vazhdojnë të mbajnë në fokus politikën monetare të Rezervës Federale. Sipas tyre, çmimet më të larta të naftës mund të shtojnë presionet inflacioniste dhe ta detyrojnë bankën qendrore amerikane të mbajë normat e interesit të larta për një periudhë më të gjatë. Pavarësisht kësaj, pritshmëritë për inflacionin mbeten deri tani relativisht të qëndrueshme.
