Shqipëria do të bëhet pjesë e Zonës Unike të Pagesave në Euro (SEPA) duke filluar nga 7 tetori, një hap që Banka e Shqipërisë e cilëson si integrim de facto në Bashkimin Evropian në fushën e pagesave. Guvernatori Gent Sejko, në Konferencën e Ambasadorëve, theksoi se ky zhvillim sjell përfitime të drejtpërdrejta për tregtinë, turizmin dhe remitancat, si dhe do të shërbejë si një sinjal pozitiv për investitorët e huaj.
“Sistemi bankar do të nisë të kryejë transfertat në SEPA më 7 tetor. Kjo është një arritje e madhe, pasi komisionet për individët dhe bizneset do të jenë të paktën pesë herë më të ulëta krahasuar me nivelet aktuale. Përveç kursimeve konkrete, kjo rrit besueshmërinë e vendit tek investitorët e huaj, duke e afruar Shqipërinë më shumë me standardet evropiane,” deklaroi Sejko.
Nga ana tjetër, ministrja për Sipërmarrjen dhe Klimën e Biznesit, Delina Ibrahimaj, e shikoi integrimin në SEPA të lidhur me transformimin digjital të ekonomisë. Ajo tha se Shqipëria tashmë ka një nivel të lartë të diplomuarish në teknologji informacioni dhe është mbështetur një numër i konsiderueshëm startup-esh.
“Shqipëria duhet të kthehet në një vend niche për ofrimin e shërbimeve digjitale të qeverisjes dhe produkteve të teknologjisë. Qeveria ka investuar shumë në digjitalizim dhe informatizim, por sfida mbetet tek biznesi, i cili duhet të rrisë produktivitetin dhe konkurrueshmërinë duke përdorur metoda digjitale të prodhimit. Kjo do të jetë një nga prioritetet e katër viteve të ardhshme,” u shpreh Ibrahimaj.
Konferenca e Ambasadorëve, e cila zgjat tre ditë, po zhvillohet me pjesëmarrjen e përfaqësuesve diplomatikë të Shqipërisë në botë dhe fokusohet në integrimin evropian, diplomacinë ekonomike, si dhe çështjet e sigurisë rajonale dhe globale. /skyweb.l
