Nëse keni një automjet që nuk e përdorni për një periudhë të gjatë, mund ta çregjistroni përkohësisht dhe të shmangni pagesën e detyrimeve vjetore gjatë kohës që qëndron jashtë qarkullimit.
Drejtoria e Përgjithshme e Shërbimeve të Transportit Rrugor sqaron se pronari mund të kërkojë çregjistrimin e përkohshëm të mjetit duke paraqitur dokumentin e identifikimit, lejen e qarkullimit dhe targat.
Përpara kryerjes së procedurës, të gjitha detyrimet e automjetit duhet të jenë shlyer deri në datën e çregjistrimit.
Pas dorëzimit të targave dhe dokumentacionit, pronari nuk paguan detyrimet vjetore për periudhën gjatë së cilës automjeti qëndron i çregjistruar.
Mjeti nuk mund të qarkullojë në rrugë gjatë kësaj kohe, por mund të riaktivizohet kur pronari të vendosë ta përdorë përsëri.
DPSHTRR i ruan targat dhe dokumentet e automjetit pa pagesë për një periudhë deri në pesë vjet.
Kjo procedurë është veçanërisht e vlefshme për automjetet që mbahen për një kohë të gjatë në garazh, përdoren vetëm sezonalisht ose pronarët e të cilave ndodhen jashtë vendit.
Në vend që të paguajnë çdo vit për një makinë që nuk përdoret, qytetarët mund ta nxjerrin përkohësisht nga qarkullimi dhe ta riaktivizojnë vetëm kur t’u nevojitet.
