Rritja e temperaturave si pasojë e krizës klimatike mund të shtojë ndjeshëm barrën e sëmundjeve kardiovaskulare të lidhura me të nxehtin deri në vitin 2050.
Një studim i ri i kryer nga studiues të Case Western Reserve University, University Hospitals dhe Louis Stokes Cleveland VA Medical Center, i publikuar në JAMA Cardiology, vlerëson se temperaturat më të larta mund të çojnë në një rritje deri në 200 për qind të problemeve kardiovaskulare që lidhen me stresin termik.
Sipas studiuesve, të nxehtit ekstrem mund të nxisë infarkte dhe episode të tjera kardiovaskulare, sidomos te personat më të ndjeshëm. Kur temperatura rritet, zemra detyrohet të punojë më fort për të ndihmuar trupin të ruajë temperaturën e brendshme. Në të njëjtën kohë, rritet edhe mundësia e formimit të papritur të mpiksjeve të gjakut.
Për të arritur në këto përfundime, studiuesit analizuan të dhëna për sëmundjet e zemrës gjatë periudhës 2010 deri në 2016 dhe më pas ndërtuan parashikime deri në vitin 2050.
Në përllogaritjet e tyre, ata përdorën të dhënat e bazës Global Burden of Disease, një model klimatik të NASA-s për temperaturat historike dhe të ardhshme, si edhe të dhëna të popullsisë nga U.S. Census Bureau.
Gjetjet e studimit shtojnë shqetësimet për ndikimin e ndryshimeve klimatike mbi shëndetin publik. Sipas autorëve, rritja e temperaturave nuk është vetëm një problem mjedisor, por edhe një faktor që mund të rëndojë më shumë sistemet shëndetësore, për shkak të shtimit të rasteve me komplikacione të zemrës të lidhura me vapën.
Studimi nënvizon se ekspozimi ndaj temperaturave të larta mund të bëhet një rrezik gjithnjë e më i madh për shëndetin kardiovaskular, veçanërisht në dekadat e ardhshme, nëse trendi i ngrohjes globale vijon me të njëjtin ritëm. /skyweb.al
