Pallati i Kongreseve pritet t’i nënshtrohet një procesi rikualifikimi, me synimin për ta kthyer në një hapësirë më funksionale dhe më të lidhur me zhvillimin urban e turistik të Tiranës.
Kryeministri Edi Rama, i pranishëm në Konkursin Ndërkombëtar për Rikualifikimin e Pallatit të Kongreseve, deklaroi se ndërtesa ka probleme serioze dhe se ndërhyrja është e nevojshme, por pa cenuar identitetin e saj.
Sipas Ramës, synimi është që Pallati i Kongreseve të mos mbetet më një hapësirë e shkëputur dhe pa jetë, por të kthehet në një destinacion të ri të Tiranës turistike dhe të kryeqytetit të aktiviteteve kulturore.
“Pallati i Kongreseve, ndërtesa ka probleme serioze. Është nevoja për transformim duke ruajtur identitetin e saj. Thirrja në bashkëpunim e sipërmarrjes nënkupton zhvillimin e një objekti apo tërësie objektesh pranë Pallatit të Kongreseve. Qëllimi është që ky objekt të vijë në kohë në lidhje me strukturën e riorganizuar dhe të riangazhuar cilësisht dhe që ky pallat dhe zona të bëhen një destinacion tjetër i Tiranës turistike dhe kryeqytetit të aktiviteteve kulturore”, tha Rama.
Kryeministri e krahasoi transformimin e synuar me ndryshimin që ndodhi në zonën ku më parë ndodhej stadiumi i vjetër dhe ku sot është ngritur “Air Albania Stadium”.
“Të mos e lëmë më një ishull pa jetë, por të ndodhë ajo që ka ndodhur me gropën e dikurshme me stadiumin”, u shpreh ai.
Në konkurs marrin pjesë pesë skuadra finaliste, të cilat do të prezantojnë përpara jurisë projektidetë e tyre arkitekturore për rikualifikimin e Pallatit të Kongreseve dhe zonës përreth tij.
Rama tha se deri më tani janë realizuar 15 konkurse ndërkombëtare, ndërsa tre të tjera janë në përgatitje. Sipas tij, këto konkurse janë zhvilluar sipas standardeve të larta ndërkombëtare, si për nga pjesëmarrja e arkitektëve të njohur, ashtu edhe për nga procedurat e ndjekura.
Ai shtoi se deri tani janë lidhur 12 kontrata, ndërsa 7 të tjera janë në proces.
