Kompania ajrore low-cost Ryanair njoftoi mbylljen e bazës së saj me tre avionë në Selanik për sezonin dimëror 2026, një vendim që shoqërohet me ulje të ndjeshme të kapaciteteve dhe eliminimin e 12 linjave ajrore nga programi dimëror.
Sipas kompanisë, kjo lëvizje do të reduktojë me rreth 700 mijë vendet në dispozicion (-45%), ndërsa kapacitetet do të ulen ndjeshëm edhe në aeroportet e tjera greke. Shkak për këtë vendim, sipas Ryanair, janë tarifat e larta aeroportuale, për të cilat kompania akuzon operatorin Fraport Greece për rritje të forta që kanë dëmtuar konkurrueshmërinë e tregut.
Pas këtij vendimi, Ryanair ka bërë të qartë se do të zhvendosë avionët dhe investimet drejt tregjeve më konkurruese në Europë, ku përmenden konkretisht Shqipëria, Italia dhe Suedia.
Në këtë kontekst, Tirana po del si një nga alternativat kryesore për zgjerimin e operimeve të kompanisë në rajon. Me tarifa më të ulëta aeroportuale dhe një treg në rritje të shpejtë, Shqipëria po tërheq një pjesë të kapaciteteve që po largohen nga Greqia.
Tirana International Airport është kthyer në një pikë kyçe për Ryanair në Ballkan, me bazë të konsoliduar dhe zgjerim të vazhdueshëm të linjave. Strategjia e kompanisë tregon një orientim të qartë drejt tregjeve me kosto më të ulëta dhe potencial më të madh rritjeje.
Zhvendosja e Ryanair nxjerr në pah konkurrencën në rritje mes aeroporteve në Europë, ku tarifat dhe politikat mbështetëse po bëhen faktorët kryesorë që përcaktojnë drejtimin e investimeve dhe fluturimeve. /skyweb.al
