Rritja e paralajmëruar e çmimit të bukës në qytetin e Korçës ka vënë në lëvizje Autoritetin e Konkurrencës, i cili ka nisur verifikime për të parë nëse kemi të bëjmë me një vendim të koordinuar mes furrave të bukës.
Institucioni njoftoi se ka ngritur menjëherë një grup pune për të monitoruar tregun, pasi në media u raportua se disa ndërmarrje të prodhimit dhe shitjes së bukës kanë lajmëruar pikat e tregtimit se çmimi do të rritet nga 120 lekë në 150 lekë. Kjo përfaqëson një rritje të njëkohshme me më shumë se 25 për qind.
Autoriteti i Konkurrencës ka nisur kontrolle në terren për të verifikuar nëse ky njoftim po zbatohet realisht nga bizneset dhe, mbi të gjitha, nëse kemi të bëjmë me një praktikë të koordinuar që mund të përbëjë shkelje të ligjit për mbrojtjen e konkurrencës.
Sipas ligjit nr. 9121/2003 “Për mbrojtjen e konkurrencës”, janë të ndaluara të gjitha marrëveshjet mes ndërmarrjeve që kanë si qëllim ose pasojë pengimin, kufizimin apo shtrembërimin e konkurrencës në treg. Në mënyrë të veçantë, ligji ndalon marrëveshjet që caktojnë drejtpërdrejt ose tërthorazi çmimet e blerjes apo të shitjes, si dhe çdo kusht tjetër tregtimi.
Autoriteti i Konkurrencës ka paralajmëruar se shkelja e këtij ligji përbën kundërvajtje administrative dhe mund të ndëshkohet me gjobë deri në 10 për qind të xhiros vjetore të ndërmarrjeve që rezultojnë të përfshira në marrëveshje të paligjshme. /skyweb.al
