Programi i vizës amerikane do të rifillojë pranimin e aplikimeve pas pezullimit të vendosur në muajin janar.
Sipas parashikimeve zyrtare, rreth 10 milionë persona pritet të aplikojnë këtë vit për mundësinë e jetesës dhe punës në Shtetet e Bashkuara. Departamenti Amerikan i Shtetit ka bërë publike disa ndryshime të rëndësishme në program, të cilat do të hyjnë në fuqi më 10 prill dhe do të zbatohen fillimisht për programin e vitit 2027. Në këtë kuadër, po përditësohet formulari elektronik i aplikimit (DS-5501), i cili do të jetë i disponueshëm sapo të hyjnë në fuqi rregullat e reja.
Një nga ndryshimet kryesore është detyrimi që aplikantët të paraqesin një pasaportë të vlefshme dhe një skanim të faqes me të dhënat personale dhe nënshkrimin. Kjo synon të reduktojë përdorimin e dokumenteve të falsifikuara dhe të përmirësojë procesin e verifikimit të identitetit dhe sigurisë. Zyrtarët do të kenë gjithashtu mundësinë të vlerësojnë aplikantët bazuar në vendin e lindjes dhe lidhjet e mundshme me shtete që konsiderohen me “pranueshmëri të ulët”.
Një tjetër risi është vendosja e një tarife simbolike prej 1 dollar për çdo aplikim, e cila duhet të paguhet në momentin e dorëzimit të formularit. Aplikantët duhet gjithashtu të deklarojnë nivelin e tyre arsimor, duke përfshirë diplomën e shkollës së mesme ose një ekuivalent të saj.
Për personat e martuar, kërkohet dhënia e informacionit të plotë për bashkëshortin/en, përfshirë emrin, fotografinë, datën dhe vendin e lindjes, si dhe të dhënat për të gjithë fëmijët nën 21 vjeç, qofshin biologjikë, të adoptuar apo nga martesa. Këto të dhëna janë të detyrueshme edhe në rastet kur bashkëshortët nuk jetojnë së bashku, përveç rasteve të ndarjes ligjore.
Programi parashikon gjithashtu kontrolle më të rrepta për të identifikuar martesat fiktive. Aplikantët e përzgjedhur do të duhet të paraqesin prova të vlefshme për marrëdhënien e tyre, si certifikata martese dhe dokumente të tjera mbështetëse, ndërsa autoritetet mund të kërkojnë verifikime shtesë.
Pezullimi i mëparshëm kishte ndikuar në përpunimin e aplikimeve nga 75 vende të botës, duke përfshirë kategori të ndryshme vizash si bashkimi familjar, vizat e punësimit, birësimi, vizat speciale dhe ato të diversitetit. Megjithatë, ai nuk preku vizat studentore, turistike apo të biznesit, përfshirë edhe ato për tifozët që dëshirojnë të ndjekin nga afër Kupa e Botës në FIFA.
Autoritetet amerikane theksojnë se rifillimi i programit dhe ndryshimet e reja synojnë rritjen e sigurisë, parandalimin e mashtrimeve dhe garantimin e një procesi më transparent dhe të drejtë për të gjithë aplikantët. /skyweb.al
