Gjatë muajit shkurt 2026, në territorin e Shqipërisë kanë hyrë 1.100.681 shtetas shqiptarë dhe të huaj, duke shënuar një rritje me 3.9% krahasuar me të njëjtën periudhë të një viti më parë.
Sipas të dhënave zyrtare, edhe daljet nga vendi kanë qenë në rritje, me 1.090.650 shtetas që kanë lënë territorin, ose 2.2% më shumë se në shkurt 2025.
Rritja është ndikuar kryesisht nga shtetasit shqiptarë. Hyrjet e tyre arritën në 584.450, me një rritje prej 7.6%, ndërsa daljet u rritën me 5.3%, duke arritur në 572.854 persona.
Ndërkohë, hyrjet e shtetasve të huaj mbeten pothuajse në të njëjtat nivele, me 516.231 persona, një rritje minimale prej 0.03%. Daljet e tyre kanë shënuar rënie me 1%, duke zbritur në 517.796 persona.
Sa i përket origjinës, pjesa më e madhe e shtetasve të huaj që hyjnë në Shqipëri vijnë nga Europa, ku Evropa Jugore përbën 85% të hyrjeve, e ndjekur nga Evropa Perëndimore me rreth 5%.
Në total për periudhën janar-shkurt 2026, hyrjet në vend kanë arritur në mbi 2.29 milionë persona, ndërsa daljet në rreth 2.43 milionë, duke konfirmuar një ritëm të lartë lëvizjeje në kufijtë e vendit.
Të dhënat tregojnë se në 96% të rasteve, shtetasit e huaj hyjnë në Shqipëri për qëllime personale, kryesisht turizëm apo vizita private.
