Ish-drejtoresha e AKSHI-t, Mirlinda Karçanaj, është paraqitur këtë të martë në ambientet e SPAK, ku ka qëndruar vetëm pak minuta.
Karçanaj, ndaj së cilës është vendosur masa e sigurisë “detyrim paraqitje” në lidhje me dosjen e tenderave të AKSHI-t, është parë duke hyrë e vetme në Prokurorinë e Posaçme kundër Korrupsionit dhe Krimit të Organizuar.
View this post on Instagram
Më herët, ish-drejtoresha e AKSHI-t ndodhej në arrest shtëpie, por Gjykata e Lartë vendosi lehtësimin e masës së sigurisë, duke e lënë në detyrim paraqitje.
Karçanaj është një nga tetë të pandehurit në dosjen që lidhet me skandalin e tenderave në AKSHI. Sipas akuzës, të pandehurit dyshohet se kanë vepruar si pjesë e një grupi të strukturuar kriminal, duke manipuluar procedurat tenderuese, favorizuar kompani të caktuara dhe ushtruar presion ndaj operatorëve konkurrues.
Ndaj tyre janë ngritur akuza për disa vepra penale, përfshirë konkurrencën e paligjshme nëpërmjet dhunës, heqjen e paligjshme të lirisë, shkeljen e barazisë në tendera, grupin e strukturuar kriminal dhe pastrimin e parave.
Çështja ndaj ish zyrtarëve të AKSHI-t dhe personave të tjerë të përfshirë konsiderohet një nga dosjet më të rëndësishme që lidhet me dyshimet për manipulimin e tenderave publikë në fushën e teknologjisë dhe shërbimeve digjitale.
