Një kompani e regjistruar në Shqipëri në fillim të vitit 2023, me pronësi të plotë nga një shtetas shqiptar dhe që deklaron si aktivitet “shërbime marketingu dhe komunikacioni online”, është vënë në qendër të një hetimi për dyshime mbi pastrim parash.
Raporti vjetor i Autoritetit të Inteligjencës Financiare (AIF) për vitin 2024 jep detaje të një skeme të dyshuar që përfshin qarkullim të konsiderueshëm fondesh nga jashtë dhe përdorim të mjeteve financiare për qëllime që nuk përputhen me natyrën e deklaruar të aktivitetit të kompanisë.
Transferta të mëdha me origjinë të paqartë
Gjatë një periudhe njëvjeçare, në llogaritë bankare të shoqërisë janë transferuar rreth 400 mijë euro nga një shtet evropian, të gjitha me përshkrimin “likuidim fature”. Këto fonde janë përdorur kryesisht për pagesa pagash, shpenzime operative si qira, shërbime kontabiliteti dhe të tjera, por nuk janë konstatuar pagesa që lidhen drejtpërdrejt me shërbimet e marketingut apo komunikacionit online.
Profile të pazakonta dhe lidhje të dyshimta
Hetimi i mëtejshëm ka ngritur pikëpyetje për profesionalizmin dhe përputhshmërinë e personave të përfshirë në aktivitetin e kompanisë:
Administratori i shoqërisë, shtetasi A, nuk ka përvojë profesionale të mëparshme në fushën e marketingut apo IT-së.
Pjesa më e madhe e punonjësve rezultojnë se kanë punuar më parë në “Call Center” dhe “Forex”, aktivitete të cilat në Shqipëri janë shpesh të përfshira në hetime për mashtrime financiare.
Një prej punonjësve është identifikuar përmes burimeve të hapura si i përfshirë në aktivitet kriminal.
Transferta nga kompani të dyshimta në Evropë
Subjektet që kanë dërguar fondet:
Janë regjistruar kohët e fundit në të njëjtën zonë gjeografike të një shteti evropian.
Kanë fusha të deklaruara veprimtarie të ndryshme si tregti, hotel dhe restorant, jo të lidhura me marketing apo shërbime digjitale.
Kanë kryer transfertat përmes e-banking, ndërkohë që mungon informacioni i detajuar për natyrën dhe qëllimin e këtyre pagesave.
Autoriteti shqiptar është komunikuar me Njësinë e Inteligjencës Financiare të huaj, e cila ka konfirmuar se për kompanitë dërguese ka raportime për veprimtari të dyshimtë financiare, për shkak të qarkullimit të lartë të fondeve nëpër disa shtete.
Skema ndërkombëtare e transferimeve
Transfertat janë identifikuar se vijnë nga vende si: Spanja, Franca, Lituania, Luksemburgu, Polonia, Qipro, dhe më pas shpërndahen në vende të ndryshme si: Emiratet e Bashkuara Arabe, Shqipëria, Belgjika, Zvicra, Danimarka, Mbretëria e Bashkuar, Izraeli, Sllovakia.
Subjekte të tjera të përfshira
Nga analizimi i mëtejshëm janë evidentuar edhe kompani të tjera me karakteristika të ngjashme:
Regjistrime të reja në fushën e IT dhe marketingut;
Administratorë të rinj në moshë;
Subjekte të tjera të regjistruara nga familjarë të tyre.
Bazuar në këtë informacion dhe në dyshimet për një skemë të pastrimit të parave, AIF ka referuar rastin për hetim të mëtejshëm pranë organeve të zbatimit të ligjit. Dyshohet se kompanitë me aktivitet të paqartë përdoren për të futur fonde nga jashtë dhe për t’i kanalizuar ato në mënyrë të strukturuar në vende të tjera, duke maskuar origjinën e tyre reale.
Hetimet pritet të zbardhin nëse kjo është pjesë e një rrjeti më të gjerë ndërkombëtar të pastrimit të parave dhe mashtrimeve financiare që operon përmes fasadës së aktiviteteve të marketingut dhe teknologjisë. /skyweb.al
