Kompania 2A Group e Valon Ademit ka sulmuar në Gjykatën Kushtetuese vendimin e Gjykatës së Lartë që rikthehu Mabcon e Pacollit në administrimin e Aeroportit të Vlorës, raporton Weblajm.
Përmes një padie të depozituar pak ditë më parë, 2A Group i kërkon Gjykatës Kushtetuese që të shfuqizojë vendimin e Kolegjit Civil të Gjykatës së Lartë si të papajtueshëm me Kushtetutën dhe rikthimin e çështjes për rigjykim.
Në objektin e padisë, 2A Group ka kërkuar gjithashtu pezullimin e ekzekutimit të vendimit të Gjykatës së Lartë dhe shqyrtimin e çështjes me përparësi.
Në fund të muajit Maj, Kolegji Civil i Gjykatës së Lartë riktheu në administrimin e shoqërisë koncesionare të aeroportit të Vlorës, kompaninë Mabco të Behgjet Pacollit. Kjo kompani ishte përjashtuar nga administrimi dhe i ishin ngrirë kuotat nga gjykata e shkallës së parë dhe Apeli pas padive të 2A Group për veprime të paligjshme të Mabco-s, veçanërisht marrja e një kredie 100 milionë euro nga një fond në Luksemburg në fshehtësi.
Konflikti mes dy aksionerëve, Pacolli dhe Ademi ka kaluar në disa vendime gjykatash duke u shndërruar në një sagë juridike, e cila në themel ende nuk ka filluar të gjykohet. Thelbi i konfliktit mes dy biznesmenëve kosovarë, bashkëortak në aeroportin e Vlorës, janë kuotat që duhet të ketë secila në shoqërinë koncesionare Vlora International Airport.
Në qendrën kombëtare të biznesit pronësia e koncesionit për Aeroportin e Vlorës figuron 98 për qind për Mabcon dhe 2 për qind për 2A Group. Por mes palëve është firmosur një kontratë noteriale, ku Mabco i ka shitur 47 për qind të aksioneve kompanisë 2A Group.
Kjo kontratë tashmë mohohet nga Pacolli, i cili pretendon se ja kanë marrë firmën me mashtrim, pavarësisht se shitja është miratuar nga ansambleja e kompanisë Mabco si dhe për këtë transaksion është kryer pagesa në bankë.
