Bashkimi Evropian ka miratuar rregulla të reja që ndalojnë asgjësimin e rrobave, këpucëve dhe aksesorëve të pashitur, duke detyruar kompanitë e mëdha të modës të gjejnë mënyra të tjera për menaxhimin e stokut të mbetur.
Masat, të cilat hynë në fuqi më 20 korrik, janë pjesë e Rregullores për Ekodizajnin e Produkteve të Qëndrueshme (ESPR) dhe synojnë të ulin mbetjet tekstile, të promovojnë ekonominë qarkulluese dhe të reduktojnë ndikimin e industrisë së modës në mjedis.
Sipas rregullave të reja, kompanitë e mëdha nuk do të lejohen më të asgjësojnë produktet e pashitura. Në vend të kësaj, ato do të duhet t’i nxjerrin në shitje me ulje, t’i dhurojnë, t’i ripërdorin ose t’i dërgojnë për riciklim.
Legjislacioni i ri kërkon gjithashtu që kompanitë të raportojnë publikisht sasinë e produkteve të pashitura dhe mënyrën se si i kanë menaxhuar ato, me synim rritjen e transparencës dhe përgjegjshmërisë.
Komisioni Evropian vlerëson se miliona produkte tekstile mbeten të pashitura çdo vit në BE dhe një pjesë e tyre përfundon duke u asgjësuar. Me rregullat e reja synohet zgjatja e jetës së produkteve, ulja e mbetjeve dhe nxitja e ripërdorimit e riciklimit.
Kompanitë e mesme do të kenë një periudhë kalimtare për zbatimin e këtyre detyrimeve, ndërsa bizneset e vogla dhe mikro përjashtohen nga kjo masë. /skyweb.al
