Proteinat që qarkullojnë në gjak po shihen gjithnjë e më shumë si një mjet i rëndësishëm për të kuptuar mekanizmat e sëmundjeve kronike. Ndryshe nga gjenet, të cilat tregojnë predispozita të trashëguara, proteinat pasqyrojnë në kohë reale proceset që zhvillohen në organizëm, përfshirë rregullimin e energjisë dhe shfaqjen e sëmundjeve si diabeti dhe patologjitë kardiovaskulare, shkruan “The Independent”.
Një studim i fundit, i publikuar në revistën shkencore “Circulation: Genomic and Precision Medicine”, ka hetuar lidhjen mes proteinave në gjak dhe shëndetit të zemrës. Studiuesit analizuan më shumë se 45 mijë mostra gjaku nga databaza britanike UK Biobank, duke matur nivelet e proteinave që ndikojnë drejtpërdrejt në presionin arterial dhe funksionimin e zemrës.
Gjetjet treguan se nivelet e këtyre proteinave ndryshojnë ndjeshëm nga personi në person, në varësi të faktorëve si mosha, gjinia, mënyra e jetesës, përdorimi i medikamenteve dhe origjina gjenetike.
Këto rezultate përforcojnë nevojën për një qasje më të personalizuar në mjekësi, pasi trajtimet standarde nuk japin të njëjtin efekt te të gjithë pacientët.
Një vëmendje e veçantë iu kushtua proteinës ACE2, e njohur gjerësisht gjatë pandemisë COVID-19. Përtej rolit të saj në infeksionet virale, ACE2 ndihmon në zgjerimin e enëve të gjakut duke neutralizuar substancat që shkaktojnë ngushtimin e tyre, duke ndikuar kështu në uljen e presionit të gjakut.
Studimi zbuloi se tek individët me hipertension ose diabet të tipit 2, nivelet e ACE2 janë më të larta, veçanërisht te gratë. Sipas studiuesve, kjo rritje mund të përfaqësojë një mekanizëm mbrojtës të organizmit, si përpjekje për të balancuar efektet e këtyre sëmundjeve.
Ky zbulim mund të ndryshojë mënyrën e trajtimit të hipertensionit. Aktualisht, shumë terapi synojnë bllokimin e proteinës ACE1, ndërsa ACE2 vepron në kahun e kundërt. Ruajtja e ekuilibrit mes këtyre dy proteinave mund të jetë vendimtare për përshtatjen e trajtimit më efektiv për çdo pacient.
Sipas ekspertëve, në të ardhmen, rritja e kontrolluar e niveleve të ACE2, përmes përdorimit të barnave ekzistuese si metformina ose përmes terapive të reja, mund të çojë drejt trajtimeve më të sigurta dhe më efikase për presionin e lartë të gjakut dhe diabetin. /skyweb.al
