Deleja e parë e Indisë e modifikuar gjenetikisht sapo ka mbushur një vit dhe studiuesit që e krijuan thonë se ajo është në gjendje shumë të mirë shëndetësore.
E lindur më 16 dhjetor të vitit të kaluar në Kashmirin e administruar nga India, delja është quajtur Tarmeem, një fjalë arabe që do të thotë “modifikim” ose “redaktim”.
Tarmeem mbahet në një ambient të veçantë në Universitetin Bujqësor Sher-e-Kashmir, në qytetin kryesor të rajonit, Srinagar, së bashku me ‘motrën” e saj binjake që nuk është e modifikuar gjenetikisht.
Studiuesit e universitetit i thanë BBC-së se për krijimin e saj kanë përdorur teknologjinë CRISPR, një sistem biologjik që mundëson ndryshimin e ADN-së. Kjo teknologji u lejon shkencëtarëve të veprojnë si me “gërshërë”, duke prerë pjesë të caktuara të gjeneve që shkaktojnë dobësi ose sëmundje.
“Ne nxorëm disa embrione nga dele shtatzëna dhe modifikuam një gjen specifik, të njohur si gjeni i miostatinit, i cili ndikon negativisht në rritjen e muskujve”, shpjegoi për BBC-në studiuesi Dr. Suhail Magray.
Embrionet, ose vezët e fekonduara, u mbajtën në kushte laboratorike të kontrolluara për dy deri në tre ditë dhe më pas u transferuan te një dele tjetër, e cila shërbeu si nënë pritëse.
“Më pas natyra bëri pjesën e saj, pas rreth 150 ditësh lindën qengjat”, tha ai. “Qëllimi ynë ishte të rrisnim masën muskulore të deleve dhe duke çaktivizuar gjenin e miostatinit, ia dolëm me sukses”, shtoi Magray.
Pasi Tarmeem mbushi një vit më herët këtë muaj, Prof. Riaz Shah, dekan i Fakultetit të Shkencave Veterinare dhe hetuesi kryesor i projektit, dha një përditësim mbi gjendjen e saj.
“Ajo po rritet mirë dhe po shfaq parametra normalë fiziologjikë, biokimikë dhe fizikë”, tha ai. “Rritja e muskujve të Tarmeem ka treguar, siç pritej, një rritje të ndjeshme – rreth 10% – krahasuar me motrën e saj binjake që nuk është e modifikuar. Besojmë se kjo diferencë mund të rritet edhe më shumë me kalimin e moshës.”
Sipas Prof. Shah, eksperimentimi po vazhdon për të vlerësuar shëndetin dhe mbijetesën afatgjatë të deles. Tarmeem mbahet në një mjedis të sigurt, nën mbikëqyrje të rreptë, ndërsa studiuesit kanë paraqitur edhe një projekt kërkimor pranë qeverisë për mbështetje financiare. /skyweb.al
