Të burgosurit shqiptarë në burgjet e Anglisë dhe Uellsit kanë regjistruar numrin më të lartë të telefonatave ndërkombëtare krahasuar me çdo kombësi tjetër të huaj, raportoi The Telegraph, duke iu referuar të dhënave zyrtare të Ministrisë britanike të Drejtësisë.
Sipas statistikave, gjatë gjashtë muajve të fundit janë regjistruar 157,962 telefonata ndërkombëtare, ose mesatarisht rreth 900 telefonata në ditë, të kryera nga të burgosur shqiptarë.
Shqiptarët përbëjnë gjithashtu grupin më të madh të shtetasve të huaj në burgjet e Anglisë dhe Uellsit, me mbi 1,200 të burgosur, ndërsa pas tyre renditen polakët dhe rumunët. Numri i telefonatave të kryera nga shqiptarët rezulton të jetë disa herë më i lartë se ai i kombësive të tjera.
Sipas raportimit të The Telegraph, këto të dhëna kanë ngritur shqetësime në Britani se një pjesë e grupeve të krimit të organizuar mund të vazhdojnë të koordinojnë aktivitetet e tyre edhe nga brenda burgjeve.
Ish-drejtori i burgjeve britanike, Ian Acheson, i cituar nga gazeta, e cilësoi shifrën e telefonatave si “jashtëzakonisht joproporcionale”, duke theksuar se autoritetet duhet të hetojnë nëse komunikimet po përdoren për të drejtuar aktivitete kriminale.
Ndërkohë, deputeti konservator Nick Timothy ka kërkuar publikimin e statistikave të kriminalitetit sipas kombësisë së shtetasve të huaj, duke argumentuar se transparenca është e nevojshme për të kuptuar më mirë përmasat e fenomenit.
Të dhënat e publikuara nga Ministria britanike e Drejtësisë vijnë në një kohë kur autoritetet në Mbretërinë e Bashkuar po intensifikojnë masat kundër krimit të organizuar dhe po vijojnë bashkëpunimin me Shqipërinë për transferimin dhe deportimin e shtetasve shqiptarë të dënuar.
