Nga moslëshimi i kuponit tatimor dhe punonjësit e padeklaruar, te refuzimi i pagesës me kartë, qytetarët mund të raportojnë përmes telefonit rastet e dyshuara të informalitetit.
Administrata Tatimore ka prezantuar një aplikacion të ri për denoncimin e shkeljeve tatimore dhe evazionit fiskal, duke u dhënë qytetarëve mundësinë të raportojnë drejtpërdrejt nga telefoni.
Aplikacioni është i disponueshëm për shkarkim në Apple App Store dhe Google Play. Përdoruesi duhet të zgjedhë kategorinë e shkeljes dhe më pas të plotësojë denoncimin me të dhënat përkatëse.
Në kategoritë e raportimit përfshihen moslëshimi i kuponit tatimor, mosdeklarimi i punonjësve, refuzimi i pagesës me kartë dhe raste të tjera të dyshuara të informalitetit.
Një nga veçoritë kryesore është mundësia për ta kryer denoncimin në mënyrë anonime. Sipas Administratës Tatimore, sistemi garanton konfidencialitetin e qytetarëve dhe synon ta bëjë raportimin më të shpejtë dhe më të sigurt.
Përmes aplikacionit, Tatimet synojnë të rrisin bashkëpunimin me qytetarët në luftën kundër evazionit fiskal dhe të zgjerojnë kontrollin ndaj bizneseve që shmangin detyrimet ligjore.
Administrata Tatimore deklaron se informacionet e raportuara do të ndihmojnë në evidentimin e rasteve të dyshuara dhe në forcimin e transparencës e të respektimit të detyrimeve tatimore.
