Një klient bleu gjysmë buke për 2.40 euro, e peshoi në shtëpi dhe zbuloi se mungonin vetëm 10 gramë.
Ankesa e tij vuri në lëvizje autoritetet dhe detyroi pronarin e furrës të instalonte pajisje të reja në të gjitha filialet.
Një ankesë për vetëm 10 gramë bukë i ka kushtuar rreth 15 mijë euro bukëpjekësit gjerman Mathias Breitner, pronar i një furre tradicionale në Pfaffenhofen an der Ilm të Bavarisë.
Prej më shumë se 60 vitesh, furra “Breitner” u shiste klientëve gjysmë buke duke e ndarë bukën në mes dhe duke tarifuar gjysmën e çmimit.
Por kjo praktikë u vu në pikëpyetje pasi një klient bleu gjysmë buke për 2.40 euro dhe e peshoi pasi mbërriti në shtëpi.
Klienti pretendoi se pjesa e blerë ishte 10 gramë më e lehtë se gjysma e peshës së deklaruar.
Breitner fillimisht nuk e mori seriozisht ankesën dhe iu përgjigj: “Ndonjëherë fiton, ndonjëherë humbet. Herën tjetër mund të marrësh 10 gramë më shumë”.
Por klienti iu drejtua Zyrës së Peshave dhe Matjeve. Pas kontrollit, autoritetet i ndaluan furrës shitjen e gjysmave të bukës pa i peshuar individualisht me peshore të certifikuara dhe pa llogaritur çmimin sipas peshës së saktë.
Rregullat gjermane parashikojnë që kur një bukë ndahet me kërkesë të klientit, pjesa e shitur duhet të peshohet dhe çmimi të përcaktohet për çdo gram. Alternativa ishte shitja e gjysmave të përgatitura më parë, por pronari argumentoi se buka do të thahej duke qëndruar e prerë në raft.
Për të vazhduar shitjen, Breitner instaloi nëntë peshore precize në qendrën e prodhimit dhe në gjashtë filialet e tij.
Së bashku me programet kompjuterike, lidhjen me kasat, trajnimin e punonjësve dhe kohën e punës, fatura arriti në rreth 15 mijë euro.
Tashmë çdo pjesë buke peshohet dhe shitet me çmimin e saktë, çka ka sjellë edhe tarifa të pazakonta që ndryshojnë me disa cent.
Sipas bukëpjekësit, klientët tani ankohen për çmimet jo të rrumbullakëta dhe kasat janë mbushur me monedha një dhe dy centëshe.
Breitner pranoi se duhej ta kishte zgjidhur ankesën duke i dhuruar klientit një tjetër gjysmë buke. “Kjo ishte gabimi im”, deklaroi ai, duke shtuar se investimi prej 15 mijë eurosh nuk do t’i kthehet ekonomikisht.
