Qeveria ka paralajmëruar penalitete ndaj koncesionarit të Aeroportit të Vlorës për shkak të vonesave dhe konflikteve mes ortakëve, ndërsa nuk ka përjashtuar as mundësinë e prishjes së kontratës koncesionare nëse nuk respektohen afatet.
Ministri i Infrastrukturës, Enea Karakaçi deklaroi se Ministria e Infrastrukturës nuk do të ndërhyjë në konfliktin mes dy ortakëve të projektit, por theksoi se përplasjet dhe shkeljet kontraktuale po ndikojnë drejtpërdrejt në shtyrjen e hapjes së aeroportit.
“Ministria verën me shqetësim të thellë se sjellja deri tani e palës zhvilluese, konfliktet mes palëve, shkeljet kontraktuale kanë shkaktuar vonesë. Kjo nuk do tolerohet dhe do të ketë edhe penalitete. Ministria nuk është palë në konflikt dhe nuk ka interes të favorizojë asnjë palë, por do të marrim masa dhe do të ndërhyhet përmes klauzolave të kontratës që të hapet sa më shpejt”, deklaroi Karakaçi.
Ministri paralajmëroi se qeveria po shqyrton të gjitha opsionet që parashikohen në kontratë, përfshirë edhe shkëputjen e koncesionit në rast se situata nuk zgjidhet dhe afatet vijojnë të shkelen.
“Sa i përket klauzolave, siç e theksova, aeroporti i Vlorës është ndër veprat më të rëndësishme të dekadës së fundit. Nuk ndërtohen aeroporte çdo vit, as në botë. Aeroporti nuk është ende operacional dhe klauzolat parashikojnë vendosjen e penaliteteve, të cilat do të vijojnë të përcaktohen sipas kontratave. Më pas do të hartohet një plan në lidhje me shtyrjen apo edhe shkëputjen e kontratës koncesionare”, u shpreh ai.
Deklaratat vijnë në kulmin e përplasjes mes ortakëve të projektit të Aeroporti Ndërkombëtar i Vlorës, konflikt që ka sjellë tensione në kantier dhe ka ngritur pikëpyetje mbi fatin e një prej investimeve më të rëndësishme strategjike në jug të vendit. /skyweb.al
