Shteti mund të marrë përsipër garantimin e deri në 30% të vlerës së banesës për familjet që përfitojnë kredi të lehtësuar për strehim. Mekanizmi i ri parashikohet në projektligjin për ndryshimin e ligjit “Për strehimin social”, i cili është hedhur për konsultim.
Projektligji krijon Garancinë Sovrane, përmes së cilës shteti garanton një pjesë të principalit të kredisë së dhënë nga bankat ose institucionet financiare për blerjen e banesës.
Sipas relacionit që shoqëron nismën, i konsultuar nga skyweb.al, garancia propozohet të mbulojë deri në 30% të vlerës së pronës.
Nga skema parashikohet të përfitojnë rreth 4,100 familje, ndërsa kostoja e vlerësuar e garancisë arrin në rreth 231 milionë lekë. Qëllimi është të ndihmohen familjet që nuk arrijnë të sigurojnë vetë financimin e nevojshëm për blerjen e një banese dhe që hasin vështirësi në marrjen e kredisë.
Garancia shtetërore pritet të ulë rrezikun për bankat dhe të lehtësojë financimin e përfituesve të programeve të strehimit.
Megjithatë, masa nuk nënkupton faljen apo pagesën nga shteti të 30% të kredisë. Huamarrësi do të mbetet përgjegjës për shlyerjen e plotë të detyrimit.
Garancia do të aktivizohet vetëm në rast se përfituesi nuk paguan kredinë dhe banka ka ndjekur më parë procedurat për rikuperimin e shumës.
Edhe pasi garancia aktivizohet, shteti do të ketë të drejtën t’ia kërkojë huamarrësit paratë e paguara në emër të tij. Përqindja përfundimtare, kriteret e përfitimit, mënyra e aplikimit dhe administrimi i skemës do të përcaktohen me vendim të Këshillit të Ministrave. Garancia do të jepet brenda kufijve të miratuar çdo vit në buxhetin e shtetit. /skyweb.al
