Departamenti Amerikan i Transportit prezantoi të mërkurën një fushatë kombëtare për të rikthyer qytetarinë në udhëtimet ajrore, duke u bërë thirrje amerikanëve të vishen “me respekt” dhe të tregojnë mirësjellje bazike, si “ju lutem” dhe “faleminderit”, ndaj ekuipazhit. Por ekspertët e udhëtimeve mbeten skeptikë se kjo fushatë do të sjellë ndryshim real.
Fushata, e quajtur “Epoka e artë e udhëtimit fillon me ty”, synon të “ringjallë një diskutim kombëtar se si mund të rikthejmë edukatën dhe klasin në fluturime”, sipas njoftimit të institucionit.
Sekretari i Transportit, Sean Duffy, e ka ndërmarrë nismën si reagim ndaj rritjes së incidenteve me pasagjerë të padisiplinuar, përfshirë përplasjet me udhëtarë të tjerë apo me stafin e kompanive ajrore.
Të dhënat e FAA tregojnë se rastet kulmuan në vitin 2021, por sot vazhdojnë të jenë dy herë më të larta se para pandemisë.
Departamenti nuk sqaron se çfarë nënkupton “veshja me respekt”. Në rrjetet sociale, Duffy ka shkruar:
“Vishem mirë për të shkuar në aeroport, ndihmo një të panjohur, dhe shko me humor të mirë.”
Ai u kërkon pasagjerëve të reflektojnë mbi pesë pyetje për të garantuar qytetari:
• A po ndihmoni një grua shtatzënë apo një të moshuar me vendosjen e çantave në dollap?
• A po visheni me respekt?
• A po kontrolloni fëmijët tuaj gjatë udhëtimit?
• A po i falënderoni stjuardesat?
• A po përdorni “ju lutem” dhe “faleminderit”?
Ekspertët thonë se veshja formale nuk ka gjasa të ndryshojë sjelljen e pasagjerëve. Sot, shumica e udhëtojnë duke vlerësuar rehatinë, për shkak të hapësirës së ngushtë dhe vonesave të shpeshta.
Përballë thirrjes së Duffy-t, një pjesë e përdoruesve në rrjete sugjeruan zgjidhje të tjera më praktike: sedilje më të gjera në klasën ekonomike, pika kontrolli më miqësore dhe më shumë lehtësira për pasagjerët. Edhe ata që mbështesin rritjen e qytetarisë theksojnë se komoditeti i ulët i detyron njerëzit të vishen thjesht.
Ekspertët vërejnë se udhëtimi ajror i dekadave të shkuara ishte një realitet krejt tjetër. “Klasa ekonomike dikur ishte e rehatshme. Sot të gjithë shtrydhen në avionë,” thotë Chris Elliott, ekspert udhëtimesh.
Edhe Sarah Silbert, analiste në Points Path, thekson se udhëzimi për veshjen “nuk është i zbatueshëm në praktikë dhe nuk do të ndryshojë sjelljen”.
“Të gjithë e interpretojnë ndryshe çfarë do të thotë ‘të vishesh mirë’,” shton Daniel Green, bashkëthemelues i Faye Travel Insurance. “Në fund, kjo është thjesht një fushatë me qëllime të mira për sjellje në publik, pa efekt të prekshëm.”
Pse janë shtuar incidentet?
Sipas Transport Security International, shtimi i pasagjerëve problematikë lidhet me konsum alkooli, drogë, probleme të shëndetit mendor dhe stres nga fluturimet e mbingarkuara me vonesa e anulime.
Scott Keyes, themelues i Going.com, kujton se “epoka e artë” e fluturimeve nuk ishte e artë për shumicën e amerikanëve. Çmimet ishin aq të larta sa udhëtimi me avion ishte privilegj vetëm për të pasurit.
“Sot udhëtojnë njerëz nga çdo shtresë. Fushata i referohet një kohe kur vetëm elita fluturonte,” thotë ai.
Ai shton se, pavarësisht nostalgjisë, udhëtimi i dikurshëm kishte edhe probleme të rëndë: fluturimet ishin më të gjata, nuk kishte Wi-Fi dhe kabina mbushej me tym cigaresh.
Edhe për këtë arsye ai nuk pret që amerikanët të fillojnë të vishem me kostume për të udhëtuar:
“Nëse fluturimi është i përballueshëm për të gjithë, duhet pranuar që njerëzit do sillen si janë. Nuk mendoj se duhet të jetojmë në një shoqëri ku ka rekomandime se si të vishesh për të hipur në avion.” /skyweb.al
