Vetëm gjatë së hënës u regjistruan mbi 1.500 anulime fluturimesh drejt dhe nga rajoni, ndërsa në fundjavë shifrat arritën në disa mijëra.
Mijëra pasagjerë kanë mbetur të bllokuar në aeroporte, pasi një seri vendesh në Gjirin Persik mbyllën hapësirat ajrore për arsye sigurie. Situata po konsiderohet si një nga tronditjet më të mëdha për udhëtimet ajrore që nga pandemia.
Aeroportet kryesore të rajonit, përfshirë Dubain dhe Abu Dhabin, operojnë vetëm me kapacitete të kufizuara, ndërsa disa kompani ajrore kanë pezulluar plotësisht fluturimet. Emiratet e Bashkuara Arabe kanë lejuar vetëm fluturime speciale për të evakuuar pasagjerët e mbetur në pritje.
Hapësira ajrore mbi Iranin, Irakun, Izraelin, Kuvajtin, Katarin dhe Bahreinin është praktikisht e zbrazët, sipas të dhënave të monitorimit të trafikut ajror.
Ndërprerjet nuk janë kufizuar vetëm në Lindjen e Mesme, por kanë prekur edhe itinerare ndërkontinentale drejt Evropës dhe Azisë, me linja ajrore që kanë riplanifikuar ose anuluar dhjetëra shërbime.
Vështirësitë shtohen nga fakti se ekuipazhet dhe pilotët janë shpërndarë në aeroporte të ndryshme, çka e bën më të komplikuar rikthimin e shpejtë të operacioneve edhe nëse hapësirat ajrore rihapen.
Tensionet kanë reflektuar menjëherë edhe në tregjet financiare. Aksionet e kompanive të mëdha ajrore dhe turistike kanë pësuar rënie, ndërsa çmimi i naftës është rritur ndjeshëm, duke shtuar presionin mbi kostot operative të linjave ajrore.
Brent është ngjitur drejt nivelit 80 dollarë për fuçi, me analistët që paralajmërojnë rritje të mëtejshme nëse kriza vazhdon.
Në këtë klimë pasigurie, një pjesë e udhëtarëve me kapacitet financiar të lartë po zgjedhin fluturime private për t’u larguar nga rajoni, me çmime që arrijnë në qindra mijëra dollarë për një itinerar drejt Evropës.
Situata mbetet fluide dhe e varur nga zhvillimet e sigurisë në rajon, ndërsa aviacioni global po përballet me një tjetër test të fortë në një periudhë tensioni të lartë gjeopolitik. /skyweb.al
