Shqipëria ka tashmë një hartë të re aeronautike të standardit ndërkombëtar ICAO në shkallën 1:500 000, e prodhuar nga Albcontrol në bashkëpunim me Autoritetin Shtetëror për Informacionin Gjeohapësinor.
Harta përmbush kërkesat e Organizatës Ndërkombëtare të Aviacionit Civil për navigimin ajror vizual dhe shërben si një instrument i rëndësishëm për planifikimin para fluturimit. Ajo përfshin informacion të detajuar mbi hapësirën ajrore, aerodromet, zonat e kufizuara, pengesat, pikat e raportimit dhe elemente të tjera thelbësore për sigurinë e operimeve ajrore.
Dokumenti i ri hartografik mbulon të gjithë territorin e Shqipërisë dhe hapësirën përreth, duke reflektuar strukturën aktuale të hapësirës ajrore dhe ndarjen e zonave të kontrollit. Përmes këtij produkti, përditësohen të dhënat që përdoren nga pilotët për navigimin vizual, si dhe nga operatorët ajrorë për planifikimin e itinerareve.
Publikimi i hartës konsiderohet një hap i rëndësishëm në përmirësimin e infrastrukturës së informacionit aeronautik dhe në rritjen e standardeve të sigurisë së fluturimeve në hapësirën ajrore shqiptare.
Çfarë është harta aeronautike
Harta aeronautike është një hartë e specializuar për aviacionin, e krijuar për t’u përdorur nga pilotët dhe kontrollorët e trafikut ajror.
Nuk është hartë e zakonshme si ato rrugore apo turistike. Ajo përmban informacion teknik të domosdoshëm për fluturimin, si:
• Hapësirat ajrore dhe kufijtë e tyre
• Aeroportet dhe aerodromet
• Zonat e ndaluara ose të kufizuara për fluturim
• Lartësitë e terrenit dhe pengesat si antena, male, ndërtesa të larta
• Pikat e raportimit dhe korridoret ajrore
• Frekuencat e komunikimit
Pilotët e përdorin për navigim, veçanërisht në fluturimet vizuale ku orientimi bëhet duke parë terrenin. Gjithashtu shërben për planifikimin e rrugës para ngritjes.
Shkalla 1:500 000 do të thotë që 1 centimetër në hartë përfaqëson 5 kilometra në terren.
Me pak fjalë, është “harta rrugore” e avionëve, por shumë më teknike dhe e standardizuar sipas rregullave ndërkombëtare të aviacionit. /skyweb.L
