Puna jashtë orarit zyrtar, pa pagesë dhe pa regjistrim, mbetet një problem serioz për punonjësit në Greqi, pavarësisht vendosjes së sistemit elektronik për monitorimin e orëve të punës.
Një sondazh i publikuar nga platforma e rekrutimit kariera.gr zbulon se 42% e punonjësve të anketuar deklarojnë se nuk paguhen dhe nuk u njihen zyrtarisht orët shtesë të punës.
Sondazhi, i zhvilluar gjatë muajit shtator përmes platformës LinkedIn, ka analizuar mënyrën se si zbatohet karta dixhitale e punës, respektimin e orarit dhe kompensimin e punonjësve.
Sipas rezultateve, 26% e të anketuarve pranojnë se vazhdojnë të punojnë edhe pasi kanë regjistruar elektronikisht përfundimin e orarit, pa deklaruar kohën shtesë.
Ndërkohë, 62% thonë se e ndërpresin punën në përfundim të orarit zyrtar, 7% nuk e dinë nëse orët shtesë regjistrohen, ndërsa vetëm 3% deklarojnë se vazhdojnë të punojnë me orët shtesë të regjistruara rregullisht.
Sondazhi zbulon gjithashtu presionin që përballojnë punonjësit për të qëndruar në punë përtej orarit të përcaktuar.
Rreth 25% e të anketuarve deklarojnë se do të pranonin të punonin më gjatë edhe pa regjistrimin e orëve shtesë, nëse kjo do t’u kërkohej nga drejtuesit.
Nga ana tjetër, 36% do të pranonin vetëm nëse orët shtesë regjistrohen zyrtarisht, ndërsa 20% do ta refuzonin kërkesën.
Sa i përket kompensimit, 45% deklarojnë se paguhen për orët shtesë, 42% nuk marrin asnjë pagesë apo njohje zyrtare, ndërsa 4% kompensohen me ditë ose orë pushimi.
Të dhënat tregojnë gjithashtu se 36% e punonjësve e konsiderojnë punën jashtë orarit si pasojë të ngarkesës së lartë, ndërsa 34% e shohin si domosdoshmëri në periudha të caktuara.
Vetëm 10% e lidhin qëndrimin e zgjatur në punë me përkushtimin ndaj punëdhënësit.
Zenia Delagrammati, drejtuese e burimeve njerëzore në Optima Group dhe kariera.gr, thekson se teknologjia dhe legjislacioni nuk mjaftojnë për të garantuar respektimin e orarit të punës.
Sipas saj, kompanitë duhet të krijojnë një kulturë pune që respekton kohën e punonjësve dhe garanton kompensimin e orëve shtesë.
Rezultatet vijnë në një kohë kur Greqia po zgjeron përdorimin e kartës dixhitale të punës, sistem që synon të kontrollojë oraret reale dhe të kufizojë punën e padeklaruar. /skyweb.al
