Në kulmin e debatit publik për sigurinë ushqimore, Autoriteti Kombëtar i Ushqimit në Shkodër ka njoftuar bllokimin e një sasie prej 114 kilogramësh djathë kaçkavall dele, pas kryerjes së analizave laboratorike, por pa dhënë asnjë sqarim konkret mbi shkaqet që çuan në këtë masë ekstreme.
Sipas njoftimit zyrtar, inspektimi u zhvillua jashtë planit në një stabiliment përpunimi të qumështit, pas rezultatit të analizave të kryera në kuadër të kontrollit zyrtar.
AKU informon se, bazuar në ligjin për inspektimin, është marrë masa e bllokimit të produktit dhe ndërprerja e menjëhershme e linjës së prodhimit, derisa të plotësohen kushtet për rifillimin e aktivitetit.
Por ndërsa institucioni konfirmon ndërhyrjen dhe asgjësimin e produktit, mbetet i paqartë shkaku konkret i bllokimit.
- A kishte prani vaji palme në përbërje të djathit?
- A u konstatuan mbetje qumështi pluhur?
- A pati probleme me kushtet higjieno-sanitare apo paketimin?
- A pati probleme me paketimin, etiketat?
Asnjë nga këto pyetje nuk merr përgjigje nga deklarata e AKU-së, duke shtuar edhe më tej mungesën e transparencës, në një moment kur shqetësimi i konsumatorëve për sigurinë ushqimore është më i lartë se kurrë.
Në vijim të njoftimit, AKU Shkodër deklaron se do të intensifikojë kontrollet në stabilimentet përpunuese të qumështit gjatë sezonit turistik, duke vendosur theksin tek mbrojtja e shëndetit të konsumatorit. Por publikimi i pjesëshëm i informacionit dhe mungesa e detajeve konkrete mbi arsyet e bllokimit të këtij produkti, lë hapësirë për dyshime dhe rrit pasigurinë e konsumatorit mbi sigurinë reale të produkteve që qarkullojnë në treg. /skyweb.al
