Riviera Shqiptare po fiton gjithnjë e më shumë vëmendje në arenën ndërkombëtare. Për vitin 2025, dy nga destinacionet më magjepsëse të bregdetit shqiptar, Gjiri i Gramës dhe Gjiri i Gjipesë, janë përfshirë në listën prestigjioze të 50 plazheve më të mira në Europë, një renditje që realizohet çdo vit nga platforma globale “The World’s 50 Best Beaches” dhe që referohet gjerësisht edhe nga Forbes.
Ky vlerësim i ri e pozicionon Shqipërinë krahas destinacioneve më të famshme turistike të Mesdheut. Gjiri i Gramësrenditet në vendin e 12-të, ndërsa Gjiri i Gjipesë në vendin e 30-të, duke tejkaluar edhe shumë plazhe ikonike të Spanjës, Italisë, Greqisë apo Francës.
Përzgjedhja bëhet mbi bazën e kritereve rigoroze që vlerësojnë natyrën autentike, peizazhin e paprekur, qetësinë, përvojën unike që i ofrohet vizitorit dhe largësinë nga mbipopullimi.
Një panel prej rreth 1 000 profesionistësh udhëtimesh, ambasadorësh plazhesh dhe ekspertësh ndërkombëtarë kanë votuar për të ndërtuar këtë listë elitare.
Gjiri i Gramës ofron një spektakël natyror ku deti kristal hyn mes shkëmbinjve masivë duke krijuar një peizazh të rrallë dhe një atmosferë tërësisht të paprekur nga zhvillimi urban.
Ndërkohë, Gjiri i Gjipesë, i vendosur në hyrje të kanionit spektakolar të Gjipesë është kthyer në një simbol të ekoturizmit shqiptar, duke ofruar një eksperiencë të rrallë për të apasionuarit pas natyrës, aventurës dhe qetësisë.
Kjo arritje e re vjen si një promovim i jashtëzakonshëm për Shqipërinë, duke i dhënë turizmit shqiptar një tjetër dritare të rëndësishme ekspozimi përpara sezonit të ri veror dhe duke e pozicionuar vendin gjithnjë e më shumë si një destinacion tërheqës për turistët e huaj që kërkojnë natyrë të paprekur dhe eksperienca autentike mesdhetare. /skyweb.al
