Vendet europiane po zhvendosin një pjesë të rezervave të tyre të arit nga Amerika e Veriut drejt Europës, në një kohë kur tensionet gjeopolitike dhe pasiguria ekonomike globale janë rritur ndjeshëm.
Banka Qendrore e Holandës njoftoi se ka transferuar 86 tonë ar nga rreth 313 tonë që mbante në Shtetet e Bashkuara dhe Kanada.
Sipas saj, lëvizja synon ta bëjë vendin më të përgatitur për kriza të rënda dhe të garantojë akses më të shpejtë te rezervat.
Rreth 59 tonë ar u shitën në Nju Jork dhe u riblenë në Londër, duke shmangur transportin fizik përtej Atlantikut.
Ndërkohë, mbi 27 tonë u transportuan fizikisht nga SHBA-ja dhe Kanadaja drejt qytetit holandez Zeist, ndërsa një sasi e ngjashme u dërgua më pas nga Holanda në Londër.
Guvernatori i Bankës Qendrore holandeze, Olaf Sleijpen, deklaroi se autoritetet nuk presin ta përdorin arin, por synojnë të forcojnë qëndrueshmërinë dhe gatishmërinë e vendit përballë situatave të jashtëzakonshme.
Londra është zgjedhur për shkak të rolit të saj si një prej qendrave kryesore botërore të tregtimit të arit.
Në kasafortat e Bankës së Anglisë ndodhen rreth 400 mijë shufra ari, me vlerë mbi 200 miliardë paund.
Holanda nuk është vendi i vetëm që po ndjek këtë strategji.
Franca njoftoi gjatë këtij viti kthimin e rezervave të saj nga SHBA-ja, ndërsa Gjermania kishte transferuar deri në vitin 2016 mbi 216 tonë ar nga Nju Jorku dhe Parisi.
Ekspertët vlerësojnë se këto lëvizje nuk sinjalizojnë domosdoshmërisht një krizë të afërt.
Krahas luftërave dhe tensioneve tregtare, vendimet ndikohen edhe nga inflacioni, normat e interesit dhe nevoja që rezervat të mbahen në vende ku mund të tregtohen me shpejtësi.
Bankat qendrore kanë rritur ndjeshëm blerjet e arit.
Gjatë katër viteve të fundit ato kanë blerë mesatarisht rreth 1 mijë tonë në vit, dyfishi i mesatares vjetore të dekadës së mëparshme.
Kërkesa e lartë dhe roli i arit si aset i sigurt në periudha pasigurie kanë ndikuar edhe në rritjen e çmimit.
Ari kaloi nivelin rekord prej 5 mijë dollarësh për ons në janar, ndërsa Goldman Sachs parashikon që çmimi të arrijë rreth 4,900 dollarë në fund të vitit 2026. /skyweb.al
