Greqia ka ndërmarrë një nismë të gjerë për uljen e çmimeve në supermarkete, në një kohë kur kostoja e jetesës dhe çmimet në raftet e marketeve kanë rënduar ndjeshëm mbi familjet. Nga sot, mbi 1,660 produkte do të shiten me çmime më të ulëta, pas një marrëveshjeje mes qeverisë, furnitorëve dhe rrjeteve të shitjes me pakicë.
Kontrasti me Shqipërinë është i dukshëm. Edhe këtu çmimet kanë vijuar të rriten, ndërsa të dhënat më të fundit tregojnë madje presione më të forta inflacioniste. Në korrik, inflacioni i harmonizuar në Shqipëri ishte 3.4%, ndërsa në Greqi 2.7%. Megjithatë, në Shqipëri nuk ka deri tani një nismë të ngjashme kombëtare që të përfshijë prodhuesit dhe supermarketet në uljen e organizuar të çmimeve.
Në Greqi, ulja mesatare për produktet e përfshira në marrëveshje është rreth 7%, ndërsa për artikuj të veçantë arrin deri në 30%.
Produktet do të dallohen lehtësisht në rafte përmes një etikete të posaçme që tregon se janë pjesë e nismës kombëtare të uljes së çmimeve. Informacioni më i hollësishëm për produktet dhe çmimet do të publikohet edhe në platformën online “PosoKanei”.
Rreth 900 produkte të markave të njohura janë përfshirë në listë, me ulje mesatare afër 7%. Nisma përfshin gjithashtu mbi 450 artikuj shkollorë, me zbritje mesatare rreth 10%, rreth 250 produkte me markën e vetë supermarketeve dhe mbi 60 produkte mishi.
Në marrëveshje janë përfshirë mbi 90 kompani furnizuese, 12 zinxhirë supermarketesh dhe tre rrjete të mëdha të lodrave dhe artikujve shkollorë.
Uljet nuk do të jenë vetëm promocione disa ditore. Sipas marrëveshjes, çmimet më të ulëta do të mbahen për një periudhë nga dy deri në katër muaj.
Madje, i njëjti produkt mund të ketë çmim të ndryshëm nga një supermarket te tjetri, pasi mbi uljen e bërë nga furnizuesi, secili rrjet mund të shtojë edhe një zbritje tjetër nga ana e tij.
Nisma vjen ndërsa Greqia vijon të përballet me problemin e kostos së jetesës. Në korrik, inflacioni i përgjithshëm i vendit ishte 3.4% sipas indeksit kombëtar, megjithëse te ushqimet dhe pijet joalkoolike rritja vjetore ishte vetëm 0.4%.
Në Shqipëri, ndërkohë, inflacioni zyrtar në korrik arriti gjithashtu 3.4%, nga 2.5% që kishte qenë një vit më parë.
Por ndërsa Athina po tenton ta përkthejë shqetësimin për çmimet në një marrëveshje konkrete me tregun, në Shqipëri konsumatori vazhdon të përballet me shtrenjtimin pa një skemë të ngjashme që të detyrojë apo nxisë tregun të ulë për disa muaj çmimet e një shporte të gjerë produktesh. /skyweb.al
