Nga ilaçet më efektive deri te faktorët më të zakonshëm që duhen shmangur, ja këshilla të bazuara në shkencë që mund të ulin vuajtjet gjatë sezonit të alergjive.
Dielli po shkëlqen, lulet po çelin – dhe, nëse je si miliona njerëz në mbarë botën, mund të jesh duke teshtitur, kollitur dhe me sy që lotojnë vazhdimisht.
Në nivel global, rreth 400 milionë njerëz vuajnë nga riniti alergjik: një gjendje që ndodh kur rrugët e hundës irritohen nga alergjenë në ajër, përfshirë polenin. Kur kjo ndodh në mënyrë sezonale, quhet ethe bari (hay fever). Në Amerikën e Veriut, njihet si alergji sezonale.
Situata përkeqësohet nga fakti se si numri i të prekurve, ashtu edhe ashpërsia e simptomave, po rriten – pjesërisht për shkak të ndryshimeve klimatike.
Fatmirësisht, nuk duhet të vuash në heshtje. Vitet e fundit janë zhvilluar trajtime më efektive se kurrë, dhe kërkimet kanë treguar si dhe kur funksionojnë më mirë. Ja nëntë këshilla për të kaluar më lehtë sezonin e alergjive – dhe kur duhet të shkosh te mjeku.
1. Zgjidh spraj nazal në vend të tabletave
Shumë njerëz marrin menjëherë antihistaminë orale si Claritin ose Benadryl. Por këto janë më pak efektive se sprajet nazale, sepse kalojnë nëpër tretje dhe shpërndahen në gjithë trupin.
Sprajet nazale veprojnë drejtpërdrejt në hundë dhe trajtojnë më mirë inflamacionin, bllokimin dhe teshtitjen.
Më efektivet janë ato me kortikosteroide, pastaj antihistaminet. Më të mirat janë kombinimet e të dyjave.
Nëse simptomat në sy vazhdojnë, pikat e syve me olopatadinë mund të ndihmojnë.
2. Shmang sprajet dekongjestive
Sprajet që zhbllokojnë hundën (me përbërës si oksimetazolina) japin lehtësim të shpejtë, por përdorimi mbi 5 ditë mund të shkaktojë “bllokim rikthyes” dhe varësi.
3. Zgjidh antihistaminë të gjeneratës së dytë
Nëse merr ilaçe orale, zgjidh opsione si cetirizina (Zyrtec), loratadina (Claritin) ose feksofenadina (Allegra).
Ato janë më efektive dhe nuk shkaktojnë shumë përgjumje si ato të vjetrat.
4. Fillo trajtimin para sezonit
Mos prit të fillojnë simptomat. Fillimi disa javë më herët jep rezultate më të mira.
5. Përdori rregullisht
Edhe në ditët pa simptoma, përdori në të njëjtën orë çdo ditë dhe sipas udhëzimeve.
6. Përdori si duhet sprajet nazale
Mos e fus shishen thellë dhe mos e ano kokën prapa.
Drejtoje sprajin drejt veshit në të njëjtën anë, mbaje kokën pak përpara dhe mos fryj hundët menjëherë pas përdorimit.
7. Përdor saktë pikat e syve
Mos e hidh direkt mbi sy.
Ano kokën anash, hidh pikën në cepin e brendshëm dhe pulit sytë për shpërndarje më të mirë.
8. Redukto ekspozimin ndaj alergjenëve
Mbaji dritaret mbyllur, përdor syze dielli ose maskë jashtë, dhe lahu pasi kthehesh në shtëpi për të larguar polenin.
9. Kërko ndihmë mjekësore nëse simptomat vazhdojnë
Alergjitë shpesh nënvlerësohen, por ndikojnë në cilësinë e jetës, gjumin dhe frymëmarrjen.
Nëse trajtimet nuk funksionojnë, konsultohu me mjekun. Mund të jetë një gjendje tjetër si astma, ose mund të përfitosh nga trajtime si imunoterapia ndaj alergjenëve.
Me trajtimin e duhur dhe disa masa parandaluese, është e mundur të kalosh sezonin e alergjive me shumë më pak shqetësime.
Marre nga BBC
