Prokuroria Speciale nis verifikimet për “ETMT Energy”: miliona euro qarkullim dhe dyshime për lidhje politike në tregun e energjisë
Prokuroria Speciale e Kosovës ka nisur verifikimet për kompaninë e tregtimit të energjisë elektrike “ETMT Energy”, pas raportimeve publike mbi aktivitetin dhe qarkullimin e saj në tregun kosovar.
Zëdhënësja e Prokurorisë Speciale, Arbnora Luta, konfirmoi se rasti po trajtohet në përputhje me legjislacionin në fuqi dhe standardet ndërkombëtare. “Ju njoftojmë se, lidhur me çështjen për të cilën keni adresuar pyetje, Prokuroria Speciale e Republikës së Kosovës është duke e trajtuar rastin në përputhje me legjislacionin në fuqi dhe standardet ndërkombëtare”, deklaroi ajo për VOX Kosova.
Verifikimet vijnë në një moment kur kompania ka shënuar një rritje të paprecedentë të aktivitetit. Sipas të dhënave të raportuara, “ETMT Energy”, në pronësi të biznesmenit nga Shqipëria Marin Gjonaj, ka realizuar mbi 24 milionë euro qarkullim vetëm gjatë muajve shkurt dhe mars 2026. Një vit më parë, në janar 2025, e njëjta kompani kishte deklaruar vetëm 90 euro qarkullim.
Pavarësisht këtij shpërthimi financiar, kompania rezulton të operojë me vetëm një punëtor të regjistruar dhe me zyra të mbyllura, sipas të dhënave të Agjencisë së Regjistrimit të Bizneseve në Kosovë.
Në sfond të hetimeve janë edhe lidhjet e raportuara të pronarit të kompanisë me figura politike në Kosovë. Marin Gjonaj rezulton në lidhje biznesore me deputetin e Lëvizjes Vetëvendosje, Ejup Ahmeti, me të cilin ndan pronësinë e kompanisë “Top Fruits” në Shqipëri. Kjo kompani është përmendur në raportime për manipulim të fondeve publike të granteve nga autoritetet shqiptare.
Ahmeti është aktualisht anëtar i Komisionit Parlamentar për Ekonomi, strukturë që mbulon edhe sektorin e energjisë elektrike dhe mbikëqyr institucionet përkatëse. Ai është raportuar gjithashtu si i vetmi komision ku bën pjesë.
Përtej lidhjeve me deputetin, Gjonaj është parë në takime edhe me zëvendësministrin e Ekonomisë në Kosovë, Getoar Mjeku, sektor kyç për politikat energjetike në vend.
“ETMT Energy” është regjistruar në Kosovë në vitin 2020 dhe është licencuar për tregtim me energji elektrike nga Zyra e Rregullatorit në shtator 2021, në periudhën kur në pushtet erdhi Vetëvendosje. Kompania operon gjithashtu edhe në Beograd, ndërsa në Shqipëri rezulton të ketë pezulluar aktivitetin në shtator 2024, pikërisht para rritjes së fortë të aktivitetit në Kosovë.
Të dhënat e siguruara për periudhën 31 mars deri më 13 prill tregojnë se Kosovës i janë shitur mbi 10 milionë euro energji vetëm në pak ditë, me “ETMT Energy” si një nga furnizuesit kryesorë.
Hyrja e shpejtë e kësaj kompanie në treg, qarkullimi i lartë financiar dhe lidhjet e raportuara me politikën kanë ngritur pikëpyetje mbi funksionimin e tregut të energjisë në Kosovë, në një kohë kur vendi mbetet i varur nga importet dhe çmimi i energjisë vijon të jetë i lartë për konsumatorët.
Hetimet e Prokurorisë Speciale pritet të sqarojnë nëse kemi të bëjmë me një aktivitet të zakonshëm tregtar në kushte krize energjetike, apo me një skemë më të gjerë që ka përfituar nga dobësitë strukturore të sistemit.
