Larja e ushqimeve para gatimit shihet nga shumë njerëz si një hap i domosdoshëm për higjienën, por Administrata Amerikane e Ushqimit dhe Barnave (FDA) paralajmëron se shpëlarja e mishit të gjallë, pulës, peshkut dhe vezëve mund të përhapë bakteret në sipërfaqet e kuzhinës.
Sipas FDA-së, larja e këtyre ushqimeve nën ujë të rrjedhshëm nuk garanton eliminimin e mikroorganizmave të rrezikshëm. Përkundrazi, pikat e ujit mund të shpërndajnë bakteret në lavaman, banak, enë kuzhine dhe ushqime të tjera që konsumohen pa u gatuar.
Për këtë arsye, autoritetet amerikane të sigurisë ushqimore këshillojnë që mishi i gjallë, shpendët, peshku dhe vezët të mos shpëlahen para përgatitjes. Siguria e tyre nuk garantohet nga larja me ujë, por nga trajtimi i duhur gjatë gatimit dhe respektimi i rregullave të higjienës në kuzhinë.
Ekspertët këshillojnë gjithashtu që duart, enët dhe sipërfaqet e punës të pastrohen pas kontaktit me ushqimet e gjalla, për të shmangur përhapjen e baktereve dhe ndotjen e ushqimeve të tjera. /skyweb.al
