Shqipëria pritet të shënojë një tjetër hap të rëndësishëm në procesin e integrimit europian. Më 26 maj, në Bruksel, Konferenca Ndërqeveritare Shqipëri BE pritet të formalizojë mbylljen me sukses të fazës hyrëse të negociatave të anëtarësimit dhe hapjen e fazës përmbyllëse të këtij procesi.
Kryeministri Edi Rama e cilësoi këtë zhvillim si një moment krenarie për vendin dhe si një fitore për projektin e Shqipërisë Europiane. Në reagimin e tij, Rama tha se procesi i negociatave nuk është bllokuar, siç sipas tij është pretenduar nga kundërshtarët politikë, por po hyn në një etapë të re dhe vendimtare.
Sipas Kryeministrit, Konferenca Ndërqeveritare e 26 majit në Bruksel është dëshmi se Shqipëria po ecën përpara në rrugën drejt Bashkimit Europian, ndërsa theksoi se ky proces është rezultat i vizionit, punës dhe përkushtimit institucional.
Rama përdori tone të forta ndaj opozitës, duke e akuzuar se ka përhapur lajme negative për Shqipërinë në arenën ndërkombëtare dhe se është përpjekur ta dëmtojë imazhin e vendit në sytë e partnerëve europianë.
“Thanë negociatat u bllokuan. Thanë Shqipëria u ndëshkua. Thanë Europa u zgjua dhe narkoregjimi u zbulua”, u shpreh Rama në reagimin e tij.
Ai shtoi se kundërshtarët politikë, sipas tij, “u lëshuan rrugëve me molotovë” dhe “nëpër Europë me thasë balte e llumi”, por në fund, sipas Kryeministrit, “humbën përsëri” dhe “Shqipëria përsëri fitoi”.
Në mesazhin e tij, Rama tha se Shqipëria Europiane është një histori suksesi që po ndërtohet hap pas hapi dhe që lidhet me objektivin për anëtarësimin e vendit në Bashkimin Europian deri në vitin 2030.
“Më 26 maj në Bruksel, Konferenca Ndërqeveritare Shqipëri BE vulos me sukses fazën hyrëse dhe çel fazën përmbyllëse të negociatave të anëtarësimit”, deklaroi Rama.
Kryeministri e cilësoi këtë si një ditë krenarie për Shqipërinë, për shumicën parlamentare, qeverinë, institucionet e pavarura dhe ekipet që përfaqësojnë vendin në tryezën e negociatave me Bashkimin Europian.
Ai falënderoi qytetarët që, sipas tij, kanë mbështetur këtë mision historik dhe e mbylli reagimin me thirrjen: “Forca Shqipëria!” /skyweb.al
