Platforma, e quajtur “Pasqyrë Albania”, është zhvilluar nga AKSHI dhe u prezantua nga kryeministri Edi Rama, i cili njoftoi se së shpejti do të jetë e aksesueshme për publikun.
Sipas Ramës, synimi është që asnjë ankesë apo kërkesë të mos humbasë më në burokracinë e administratës, ndërsa qytetarët të kenë mundësi të kontrollojnë vetë ecurinë e shërbimeve.
“Do ta kthejmë çdo hall, çdo ankesë, në pako poste dhe e ndjekim gjatë gjithë kohës se ku ndodhet”, deklaroi kryeministri.
Përmes platformës, qytetarët do të identifikohen me llogarinë e tyre në e-Albania dhe do të shohin të gjitha aplikimet, kërkesat dhe ankesat që kanë paraqitur pranë institucioneve.
Risia kryesore lidhet me kontrollin e afateve ligjore. Nëse një institucion nuk përgjigjet brenda afatit të përcaktuar, sistemi do ta evidentojë automatikisht vonesën.
Qytetari do të njoftohet me SMS dhe do të marrë një lidhje elektronike për të paraqitur menjëherë ankesën.
Çdo ankesë do të pajiset me një kod unik, ndërsa sistemi do të tregojë se në cilin institucion, sektor apo fazë të shqyrtimit ndodhet ajo.
Në rastet kur për zgjidhjen e një problemi përfshihen disa institucione, qytetari do të shohë ecurinë e kërkesës në secilin prej tyre deri në marrjen e përgjigjes përfundimtare.
Paralelisht, sistemi do të dërgojë sinjalizime edhe te drejtuesit e institucioneve për vonesat në trajtimin e ankesave.
Platforma do të ofrojë gjithashtu informacion mbi investimet publike, projektet në zhvillim, punimet e pezulluara apo të vonuara dhe vendimet e këshillave bashkiakë.
Qytetarët do të mund të njihen edhe me reformat qeveritare, të konsultojnë projektaktet dhe të japin mendimet e tyre përmes Regjistrit të Konsultimeve Publike.
Një tjetër funksion i parashikuar është komunikimi i drejtpërdrejtë me institucionet, ku punonjës të caktuar do t’u përgjigjen kërkesave të qytetarëve në kohë reale.
Sipas Ramës, ky komunikim synohet që në të ardhmen të realizohet edhe përmes agjentëve të inteligjencës artificiale.
“Pasqyrë Albania” do të jetë e përdorshme përmes kompjuterit dhe telefonave Android e iOS.
Kryeministri deklaroi se platforma synon ta vendosë administratën përballë përgjegjësisë për respektimin e afateve ligjore dhe dhënien e përgjigjeve ndaj qytetarëve.
