Mbeturinat nga një helikë e dëmtuar e motorit thyen një dritare të një avioni të Ryanair pak pasi ishte ngritur nga Greqia muajin e kaluar, sipas një raporti paraprak për incidentin, gjatë të cilit një pasagjer u tërhoq pjesërisht jashtë përmes hapjes.
Fluturimi ishte nisur nga Selaniku drejt Memmingenit, në Gjermani, kur avioni “pësoi një defekt të tipit fan-blade-out (FBO) në motorin nr. 2 (djathtas) gjatë ngjitjes pas ngritjes”, thuhet në raportin e Bordit Kombëtar të Sigurisë së Transportit të SHBA-së (NTSB).
“Copat e motorit depërtuan në trupin e avionit dhe kabina humbi presionin”, vijon raporti. “Ekuipazhi vendosi të kthehej në SKG [Selanik], ku kreu një ulje pa probleme.”
Në bord ndodheshin dy pilotë, katër stjuardesa/stjuardë dhe 149 pasagjerë. NTSB bëri të ditur se një pasagjer pësoi lëndime të rënda.
Në një deklaratë të dhënë në atë kohë, Ryanair tha se fluturimi u kthye në Selanik pasi “një dritare e pasagjerëve u shkëput gjatë fluturimit”.
Kompania ajrore tha se avioni “u ul normalisht” dhe se pasagjerët shkuan në terminal, përpara se të organizohej një fluturim zëvendësues.
Shtetasi serb Ljubisa Karović për pak sa nuk u tërhoq me kokë jashtë përmes dritares së thyer, por u shpëtua pasi pasagjerët e tjerë e mbajtën.
Duke folur në atë kohë për median serbe Nova, bashkëshortja e tij, Svetlana Grković, tha: “Presioni e tërhoqi Ljubišën jashtë; fatmirësisht ai ishte i lidhur me rripin e sigurimit, por gjysma e trupit i kishte dalë jashtë avionit.”
“Reagova menjëherë dhe i kapa këmbët. Mendova: ‘Nëse do të vdesim, do të vdesim bashkë’. Ishte e tmerrshme”, shtoi ajo.
Sipas NTSB-së, autoritetet greke ia deleguan hetimin “në tërësi” këtij institucioni një javë pas incidentit.
Hetimi deri tani ka përcaktuar se fletët e ventilatorit të motorit i ishin nënshtruar kontrolleve me ultratinguj që në muajin maj, “pa u konstatuar asnjë problem”.
Gjithashtu, u konstatua se ekuipazhet e fluturimeve kishin raportuar katër raste të dyshuara për përplasje me zogj në të njëjtin motor gjatë 12 muajve para incidentit në Selanik.
Megjithëse në kontrollet e mëvonshme të mirëmbajtjes nuk ishte regjistruar asnjë dëmtim, raporti thekson se “në dy prej rasteve raportohet se ishin gjetur mbetje zogjsh”.
Hetimi po vijon.
