Qeveria shqiptare ka miratuar një fond prej 700 milionë lekësh, rreth 7 milionë euro, si kapital fillestar për shoqërinë e re shtetërore “Albanian Digital Solution” sh.a., një strukturë e krijuar nga AKSHI për menaxhimin e sistemeve dhe shërbimeve digjitale.
Vendimi vjen në një moment kur Agjencia Kombëtare e Shoqërisë së Informacionit është në qendër të hetimeve nga SPAK për skema të dyshuara abuzimi me fondet publike dhe parregullsi në tendera, ndërsa problematikat me funksionimin e platformës E-Albania kanë shtuar presionin publik.
Sipas të dhënave zyrtare, kompania është themeluar më 14 prill 2026, me kapital 700 milionë lekë dhe administrator Saimir Kapllanin. Ajo do të ketë si funksion zhvillimin, operimin dhe mirëmbajtjen e sistemeve digjitale shtetërore, duke marrë një pjesë të rëndësishme të funksioneve teknike që deri më tani menaxhoheshin nga vetë AKSHI.
Krijimi i kësaj shoqërie bazohet në ligjin për qeverisjen elektronike, i cili i jep AKSHI-t të drejtën të krijojë shoqëri operatore në fushën e teknologjisë së informacionit, me synimin për të ndarë rolin strategjik nga ai teknik.
Megjithatë, ngritja e një tjetër shoqërie aksionare shtetërore në këtë sektor ka hapur debat mbi mënyrën se si po organizohet menaxhimi i fondeve publike në teknologji. Në praktikë, modeli i përdorur po çon drejt krijimit të strukturave të reja ligjore që marrin përsipër zbatimin e projekteve, ndërsa institucionet qendrore mbajnë rolin e mbikëqyrjes.
Ky mekanizëm shihet nga ekspertë si një formë që mund të shpërndajë përgjegjësinë institucionale, sidomos në raport me auditimet e Kontrollit të Lartë të Shtetit dhe hetimet e mundshme nga SPAK.
Në këtë kuadër, “Albanian Digital Solution” pritet të kthehet në instrumentin kryesor operacional për projektet digjitale të shtetit, duke menaxhuar investimet dhe infrastrukturën teknologjike, në një kohë kur sektori vijon të jetë nën vëmendje për mënyrën e përdorimit të fondeve publike. /skyweb.al
