Shkelja është zbuluar gjatë një kontrolli të ushtruar nga strukturat e Drejtorisë së Kontrolleve të Akcizës, bazuar në analizën e riskut ndaj operatorëve ekonomikë.
Sipas njoftimit zyrtar, subjekti i kontrolluar ishte i pajisur me autorizim për prodhimin dhe përpunimin e kafesë, duke operuar në regjimin e magazinës fiskale me pezullim të detyrimeve të akcizës.
Megjithatë, gjatë verifikimeve fizike dhe dokumentare, inspektorët kanë konstatuar një mungesë prej 69.5 tonësh kafe, për të cilën nuk rezultonin të shlyera detyrimet përkatëse të akcizës.
Nga përllogaritjet e Administratës Doganore, detyrimi i papaguar i akcizës arrin në 4.5 milionë lekë, ndërsa penalitetet e vendosura për shkeljet e konstatuara kapin vlerën e 13.3 milionë lekëve.
Në total, operatori ekonomik përballet me detyrime dhe penalitete të përllogaritura në masën 17.8 milionë lekë, ose rreth 178 mijë euro.
Doganat nuk kanë bërë publik emrin e subjektit të kontrolluar dhe as destinacionin e sasisë së kafesë që rezulton mungesë në magazinë.
Administrata Doganore njofton se për këtë rast do të vijojnë procedurat administrative, në përputhje me legjislacionin në fuqi.
Kontrolli është kryer në zbatim të ligjit nr. 61/2012, “Për akcizat në Republikën e Shqipërisë”, i ndryshuar, i cili përcakton detyrimet e operatorëve që prodhojnë, përpunojnë apo magazinojnë produkte që i nënshtrohen akcizës.
Drejtoria e Përgjithshme e Doganave bën të ditur se kontrollet ndaj subjekteve do të vijojnë, me synim evidentimin e shkeljeve, parandalimin e evazionit fiskal dhe mbrojtjen e të ardhurave të buxhetit të shtetit.
