Amazon po përgatitet për një raund të ri shkurtimesh, duke prekur deri në 30,000 punonjes, që pritet të fillojë më 28 tetor 2025. Qëllimi i kompanisë është të ulë shpenzimet dhe të kompensojë rekrutimin e tepruar gjatë periudhës së kërkesës së lartë gjatë pandemisë.
Reuters shkruan duke iu referuar burimeve të afërta me Amazon se kjo do të përfaqësojë rreth 10% të stafit korporativ, që aktualisht është rreth 350,000 punonjës. Ky është shkurtimi më i madh që nga fundi i vitit 2022, kur u larguan rreth 27,000 punonjës.
Shkurtimet do të prekin disa departamente, duke përfshirë Burimet Njerëzore, operacionet, pajisjet dhe shërbimet. Menaxherët e ekipeve janë trajnuar për të komunikuar ndryshimet me stafin, duke nisur nga mëngjesi i së martës përmes email-eve.
Kjo iniciativë është pjesë e strategjisë së CEO-së Andy Jassy për të zvogëluar burokracinë dhe për të rritur efikasitetin, duke përfshirë uljen e niveleve të menaxhimit dhe përdorimin e inteligjencës artificiale për automatizimin e detyrave rutinë. Që në qershor, Jassy paralajmëroi se rritja e përdorimit të mjeteve të AI do të çojë në më shumë shkurtime, veçanërisht për detyrat e përsëritura.
Ndërkohë, aksionet e Amazon janë rritur me 1.2% në 226.80 dollarë, ndërsa investitorët presin raportin e të ardhurave për tremujorin e tretë, që do të publikohet të enjten. /Skyweb.al
