Në një ndryshim që pritet të jetë historik në hartën e pasurisë globale, gjeneratat Millennials dhe Gen Z parashikohen të marrin drejtimin në grupin e ultra të pasurve gjatë dekadave të ardhshme, duke lënë pas Baby Boomers. Sipas studimeve dhe analizave financiare, deri më 2040, një pjesë e konsiderueshme e atyre që zotërojnë pasuri jashtëzakonisht të madhe do të jenë pjesë e brezave të rinj.
Një prej fenomeneve kryesore që po nxit këtë transformim është ajo që njihet si “Great Ëealth Transfer”, transferimi masiv i pasurisë nga brezat më të vjetër tek ata më të rinj. Sipas raportimeve, triliona dollarë pritet të kalojnë në pronësi të brezave X, Millennials dhe Gen Z në të ardhmen e afërt.
Në veçanti, ekspertët parashikojnë që Millennials dhe Gen X së bashku do të marrin pjesën më të madhe të këtij transferimi në dekadat që vijnë, ndërsa Gen Z gjithashtu do të jetë përfituese, sidomos nëse pranohet që një pjesë e kësaj pasurie të trasmetohet që më herët.
Ky fenomen nuk është vetëm çështje formule financiare, ai reflekton edhe një ndryshim në mënyrat se si brezat e rinj mendojnë për kapitalin, investimet dhe rolin e tyre në shoqëri.
Ç’ndryshon te Millennials / Gen Z krahasuar me Baby Boomers?
Ndryshe nga brezat më të vjetër, shumë nga investitorët e rinj nuk i kanë besim vetëm portofoleve tradicionale me aksione dhe obligacione. Ata kërkojnë alternative, investime në kapital privat, teknologji, start-up-e, projekte që lidhen me qëndrueshmërinë dhe sektorët me ndikim shoqëror.
Në një sondazh të Capgemini, thuhet se 81% e atyre që pritet të trashëgojnë pasuri në të ardhmen planifikojnë të largojnë firmat aktuale të menaxhimit të pasurisë të familjes së tyre, për shkak të mungesës së zgjidhjeve digjitale, shërbimeve moderne dhe adaptimit me nevojat e brezit të ri.
Brezat e rinj nuk duan të jenë thjesht donatorë që japin para, ata duan të jenë agjentë të ndryshimit. Studime kanë zbuluar se ata janë më të prirur të bëhen vullnetarë, të angazhohen në fushata, të udhëheqin projekte dhe të përdorin pasurinë jo vetëm për të pasuruar veten, por për të krijuar ndikim real social dhe mjedisor.
Ky ndryshim gjeneratash nuk është thjesht çështje ekonomike, por ka implikime themelore për mënyrën si investohet, si krijohet pasuria dhe si perceptohet ndikimi social përgjatë viteve. Ndërsa Baby Boomers dominuan epokën e industrializimit dhe kapitalit klasik, brezat e rinj do të jenë ata që do të formësojnë kapitalin e së ardhmes, me teknologji, ndërgjegje shoqërore dhe orientim në qëndrueshmëri. /Skyweb.al
