Në ishullin grek të Evias, arkeologët kanë zbuluar një tempull rreth 2 mijë vjeçar, i ndodhur pranë Tempullit të Artemisit së Amarisë, i cili përmbante ar, bizhuteri dhe thesare të tjera të çmuara, raportoi “The Independent”.
Tempulli, i ngritur mbi themele guri në një zonë me tokë të lagësht, daton në shekullin VII para Krishtit dhe u zbulua nga një ekip prej rreth 50 studiuesish. Brenda tij janë identifikuar disa struktura që mendohet se kanë shërbyer si altare, përfshirë edhe një altar unik në formë patkoi, si dhe shtresa të trasha hiri me kocka të djegura.
Ndër artefaktet e gjetura janë vazo korinthiane dhe atike, stoli prej ari, argjendi dhe korali, si dhe figurina bronzi të periudhës gjeometrike që paraqesin dema dhe dhi. Ministria Greke e Kulturës bëri të ditur gjithashtu se janë zbuluar mure masive që datojnë nga Epoka e Bakrit, pjesë e sistemit fortifikues të një vendbanimi parahistorik.
Sipas arkeologëve, ky zbulim dëshmon se kulti në këtë zonë kishte origjinë shumë të hershme, që nis menjëherë pas përfundimit të periudhës mikenase.
