Gjatë sezonit veror do të vendosen kufizime të posaçme për qarkullimin e mjeteve të rënda në akset kryesore të vendit, me qëllim lehtësimin e trafikut dhe rritjen e sigurisë rrugore në periudhën me fluks të lartë lëvizjesh.
Masat do të zbatohen nga data 19 qershor deri më 15 shtator dhe do të prekin mjetet e transportit të mallrave me masë totale maksimale të autorizuar mbi 7.5 tonë, si dhe kategori të tjera të përcaktuara në udhëzimin përkatës.
Sipas Policisë së Shtetit, kufizimet do të aplikohen kryesisht gjatë fundjavave dhe ditëve të festave zyrtare, në autostrada, rrugë interurbane dhe akse që lidhin zonat bregdetare e turistike, ku gjatë verës trafiku rritet ndjeshëm.
Kufizimet do të zbatohen sipas këtyre orareve:
Të premteve, nga ora 15:00 deri në orën 24:00.
Të shtunave, nga ora 07:00 deri në orën 24:00.
Të dielave, nga ora 07:00 deri në orën 24:00.
Për ditët e festave zyrtare, kufizimet do të nisin nga ora 15:00 e ditës pararendëse deri në orën 22:00 dhe do të vijojnë nga ora 07:00 deri në orën 24:00 të ditës së festës.
Policia sqaron se nga këto masa përjashtohen mjetet e emergjencës, mjetet e Policisë së Shtetit dhe të institucioneve të tjera shtetërore, si dhe mjetet që transportojnë mallra të domosdoshme, përfshirë produktet ushqimore që prishen.
Në raste të veçanta, për furnizime kritike apo nevoja emergjente, autoritetet kompetente mund të japin autorizime të posaçme, në përputhje me legjislacionin në fuqi.
Policia e Shtetit u bën apel operatorëve të transportit dhe drejtuesve të mjeteve që të respektojnë kufizimet, me qëllim shmangien e mbingarkesës në trafik, parandalimin e aksidenteve dhe garantimin e një sezoni turistik sa më të sigurt.
