Hoxha dëshiron të krijojë një biznes që ndërthur kajakun, natyrën dhe turizmin, duke qëndruar pranë familjes dhe miqve.
“Ka shumë turistë që vizitojnë Beratin dhe ekziston një potencial i madh për zhvillimin e shërbimeve dhe përvojave të tjera për vizitorët. Do të doja të bëja diçka në këtë fushë, duke qëndruar në qytetin tim”, shprehet ai.
Rritja e numrit të turistëve ka sjellë më shumë aktivitet për restorantet, dyqanet e vogla, operatorët turistikë dhe kantinat familjare. Ndërkohë, infrastruktura mbetet një element kyç për zhvillimin e mëtejshëm të sektorit.
Vitet e fundit, Berati ka përfituar nga Programi për Infrastrukturën dhe Zhvillimin e Turizmit në Shqipëri, i mbështetur nga Banka Europiane për Rindërtim dhe Zhvillim dhe Bashkimi Europian. Programi ndërthur investimet në infrastrukturë me mbështetjen për bizneset dhe aftësimin profesional në sektorin e turizmit.
“Vitin e kaluar u hap një urë e re mbi lumin Osum, e cila lidhi vendbanimet e izoluara më parë me qendrën e Beratit. Një rrugë që më parë kërkonte 50 minuta, tani përshkohet në më pak se 10 minuta”, deklaron Marius Qytyku, drejtues i Njësisë së Projekteve në Bashkinë e Beratit.
Investimet përfshijnë gjithashtu një rrugë drejt Parkut Kombëtar të Tomorit, ndërsa një tjetër, ende në ndërtim, pritet të përmirësojë aksesin drejt Kalasë së Beratit.
Nga zhvillimi i turizmit kanë përfituar edhe kantinat e zonës. Rreth 12 kilometra larg qytetit ndodhet kantina familjare “Alpeta”, e cila nga prodhimi tradicional i verës është shndërruar në një biznes agroturizmi që ofron akomodim, ushqim dhe guida drejt Tomorit.
Me mbështetjen e BERZH-it dhe BE-së, “Alpeta” ka marrë certifikime për sigurinë ushqimore, shëndetin dhe sigurinë, menaxhimin mjedisor dhe standardet e cilësisë.
Edhe kantina “Pupa” ka zgjeruar aktivitetin e saj. Biznesi nisi në vitin 1993 me vreshtat e para, ndërsa në vitin 2020 filloi ndërtimi i hotelit, restorantit dhe sallës së degustimit. Në vitin 2025, sipërfaqja e vreshtave u zgjerua me 20 hektarë të tjerë.
Për Endri Hoxhën, këto raste tregojnë se ndërthurja e investimeve në infrastrukturë me mbështetjen për bizneset lokale mund të krijojë vende pune dhe t’u japë të rinjve mundësinë për të ndërtuar të ardhmen në vendlindje.
