Nëntë persona janë proceduar penalisht nga Policia e Tiranës në kuadër të operacionit të koduar “Illegal Trade”.
Sipas policisë, të proceduarit janë administratorë ose përfaqësues të tetë subjekteve tregtare, ku gjatë kontrolleve u konstatuan pajisje elektronike, veshje dhe aksesorë të markave luksoze, të dyshuara si mallra të kontrabanduara.
Gjatë operacionit u sekuestruan 16 telefona celularë, 10 njësi kompjuterike, një laptop, si dhe 11 çanta dhe artikuj veshjesh të markave të njohura, të cilat nuk shoqëroheshin me dokumentacion që provonte origjinën dhe zhdoganimin e tyre.
Verifikimet zbuluan gjithashtu se të ardhurat e përfituara nga shitja e këtyre produkteve nuk ishin deklaruar pranë organeve tatimore. Ndërkohë, në një prej subjekteve u konstatua edhe shitja e produkteve pa lëshimin e kuponit tatimor, çka çoi në pezullimin e ushtrimit të aktivitetit të këtij biznesi.
Policia bëri të ditur se operacioni i koduar “Illegal Trade” u finalizua pas kontrolleve në tetë subjekte tregtare në Tiranë, ku u evidentua tregtimi i pajisjeve elektronike, veshjeve dhe aksesorëve të markave luksoze, të dyshuara se ishin futur në vend në mënyrë të kundërligjshme.
