Qindra mijëra punëtorë në mbarë botën po paguhen për të filmuar aktivitetet e tyre të përditshme, me qëllim trajnimin e sistemeve të inteligjencës artificiale që mundësojnë funksionimin e robotëve në botën reale.
Një prej tyre është Mohammed Ashim, 22 vjeç, i cili prej katër vitesh punon si berber në Bengaluru të Indisë. Së fundmi, ai ka nisur të mbajë një kamerë të vendosur në kokë, e cila regjistron lëvizjet e duarve dhe gishtave gjatë prerjes së flokëve dhe rregullimit të mjekrës, ndërsa fytyrat e klientëve turbullohen për të mbrojtur privatësinë e tyre.
Ashim regjistron pesë deri në gjashtë orë në ditë. Pamjet mblidhen nga kompania vendase Rashdan Technologies dhe më pas u shiten kompanive teknologjike dhe organizatave kërkimore, të cilat i përdorin për të trajnuar inteligjencën artificiale fizike, një teknologji që u mundëson robotëve të kryejnë detyra në mjedise reale.
Sipas bashkëthemeluesit dhe drejtorit ekzekutiv të kompanisë, Shahil Baig, të dhënat përfshijnë një gamë të gjerë aktivitetesh, nga puna industriale dhe bujqësia deri te punët shtëpiake, qepja dhe prodhimi artizanal.
Kompania paguan nga 5 deri në 10 dollarë për tetë deri në dhjetë orë regjistrime. Baig thekson se mbrojtja e privatësisë është thelbësore, ndaj pamjet përpunohen për të shmangur identifikimin personal të punëtorëve dhe personave të tjerë të filmuar.
Megjithatë, kërkesat e kompanive që zhvillojnë robotë dhe sisteme të avancuara të inteligjencës artificiale po bëhen gjithnjë e më të mëdha, duke rritur nevojën për të dhëna reale që ndihmojnë makineritë të mësojnë lëvizjet dhe aftësitë njerëzore. skyweb.al
