Në kulmin e protestave studentore dhe qytetare, kryeministri ka ndërmarrë një operacion të gjerë ndryshimesh në administratë, duke vendosur në pikëpyetje pozicionet e dhjetëra drejtorëve.
Lëvizja vjen në një moment kur presioni ndaj qeverisë është rritur ndjeshëm, ndërsa kërkesa kryesore e protestuesve mbetet largimi i Ramës. Kjo ka ngritur pikëpyetjen nëse largimet masive janë pjesë e një reformimi të administratës apo një përpjekje për të zhvendosur vëmendjen dhe për të zbutur pakënaqësinë qytetare.
Gjatë 24 orëve të fundit janë dorëhequr drejtues të disa prej institucioneve më të rëndësishme të vendit, nga Tatimet dhe Doganat te kompanitë publike të energjisë, infrastruktura, prokurimet, pronat dhe agjencitë e tjera shtetërore.
Gjithçka nisi të enjten, më 22 tetor, kur Rama u kërkoi ministrave të administronin dorëheqjet e drejtuesve të institucioneve në varësi të tyre. Procesi pritet të përfshijë 134 institucione dhe agjenci shtetërore, ndërsa afati për paraqitjen e dorëheqjeve është e hëna, 26 tetor.
Vetëm gjatë së premtes janë paraqitur ose raportuar dorëheqjet e mbi 20 drejtuesve, mes të cilëve edhe disa që administrojnë institucione me buxhete të konsiderueshme dhe përgjegjësi të drejtpërdrejta për ekonominë e vendit.
Mes tyre janë drejtori i Përgjithshëm i Tatimeve, Ilir Binaj, ai i Doganave, Besmir Beja, drejtuesi i QKB-së, Etugert Llazi, si dhe drejtuesit e KESH-it, OST-së, Albpetrolit dhe Autoritetit Rrugor Shqiptar.
Dorëheqje është raportuar edhe nga drejtoresha e Autoritetit Kombëtar të Ushqimit, Blerina Gjylameti, ndërsa Ergys Verdho i Hekurudhës Shqiptare e ka konfirmuar publikisht paraqitjen e dorëheqjes së tij.
Megjithatë, ende nuk dihet çfarë ka ndodhur me një sërë drejtuesish të tjerë të institucioneve të rëndësishme.
Mes tyre është Xheni Beqaj, drejtori i Përgjithshëm i Agjencisë Kombëtare të Bregdetit, për të cilin deri tani nuk ka një konfirmim publik se ka paraqitur dorëheqjen. E njëjta gjë vlen dhe për blerjen nga PD, Jola Hysaj, që u katapultua në krye të Agjencisë Kombëtare të Turizmit, e cila për Ramën duket se vlen më shumë se socialistët.
Po kështu, mbetet e paqartë situata e drejtuesve të Kadastrës, AKSHI-t, Agjencisë së Prokurimit Publik dhe disa institucioneve të tjera.
Një tjetër pikëpyetje lidhet me kriteret e këtij procesi. Mes drejtuesve të përfshirë është edhe Sadleva Bodo, e cila u emërua drejtoreshë e Përgjithshme e Burgjeve vetëm më 14 tetor, pra nëntë ditë përpara kërkesës për dorëheqje.
Nëse procesi synon vlerësimin e performancës, mbetet e paqartë se mbi cilat rezultate do të vlerësohet një drejtuese që sapo ka marrë detyrën.
Nga ana tjetër, dorëheqjet nuk nënkuptojnë domosdoshmërisht largim përfundimtar. Sipas burimeve qeveritare të cituara nga mediat, drejtuesit do të vijojnë përkohësisht detyrën, ndërsa në një fazë të dytë do të analizohet performanca e tyre dhe do të vendoset kush do të qëndrojë e kush do të zëvendësohet.
Lista e drejtuesve për të cilët është raportuar dorëheqje
- Ilir Binaj – Drejtoria e Përgjithshme e Tatimeve
- Besmir Beja – Drejtoria e Përgjithshme e Doganave
- Etugert Llazi – Qendra Kombëtare e Biznesit
- Jonaid Myzyri – Operatori i Blerjeve të Përqendruara
- Ami Kozeli – Autoriteti Rrugor Shqiptar
- Viola Haxhiademi – Korporata Elektroenergjetike Shqiptare
- Elisian Bici – Operatori i Sistemit të Transmetimit
- Eltar Deda – Albpetrol
- Ergys Verdho – Hekurudha Shqiptare
- Dritan Isaku – Albcontrol
- Kreshnik Bajraktari – Drejtoria e Përgjithshme e Shërbimeve të Transportit Rrugor
- Besmir Kola – Shërbimi i Provës
- Ergys Qirici – Drejtoria e Përgjithshme e Përmbarimit
- Valdrin Pjetri – Agjencia e Trajtimit të Pronave
- Eduard Merkaj – Agjencia e Mbikëqyrjes në Sistemin e Ekzekutimit të Vendimeve Penale
- Sadleva Bodo – Drejtoria e Përgjithshme e Burgjeve
- Silda Anagnosti Çepe – IdentiTek
- Laura Plaku Saro – Agjencia Shqiptare e Zhvillimit të Investimeve
- Ardita Kuçi – Agjencia për Zhvillim Bujqësor dhe Rural
- Marjeta Përlala – Agjencia Kombëtare e Mjedisit
- Blerina Gjylameti – Autoriteti Kombëtar i Ushqimit
Lista e drejtuesve për të cilët ende nuk ka konfirmim publik të dorëheqjes
- Xheni Beqaj – Agjencia Kombëtare e Bregdetit
- Lorena Goxhobelli – Agjencia Shtetërore e Kadastrës
- Igli Tafa – Agjencia Kombëtare e Shoqërisë së Informacionit
- Reida Kashta – Agjencia e Prokurimit Publik
- Bledar Kazia – Autoriteti Kombëtar për Sigurinë Kibernetike
- Adelajda Roka – Agjencia e Zhvillimit të Territorit
- Vilma Tomço – Autoriteti Shtetëror për Informacionin Gjeohapësinor
- Afrim Qendro – Inspektorati Kombëtar i Mbrojtjes së Territorit
- Jola Hysaj – Agjencia Kombëtare e Turizmit.
Për drejtuesit e listës së dytë nuk rezulton një njoftim publik i konfirmuar për paraqitjen e dorëheqjes. Kjo nuk do të thotë domosdoshmërisht se ata e kanë refuzuar kërkesën e kryeministrit apo se do të vazhdojnë përfundimisht në detyrë.
Tashmë mbetet për t’u parë nëse operacioni i ndërmarrë nga Rama do të përfundojë me ndryshime reale në drejtimin e institucioneve apo largimin e një kategorie drejtorësh dhe një operacion politik të kryeministrit nën justifikimin e protestës. /skyweb.al
