Korporata Elektroenergjitike Shqiptare po avancon me projektin për prodhimin e energjisë diellore në digën e Zadejës, pjesë e HEC-it të Vaut të Dejës.
Enti Rregullator i Energjisë ka hapur procedurën administrative për licencimin e KESH-it për një impiant fotovoltaik me kapacitet të instaluar 8.25 MW në digën e Zadejës, në qarkun Shkodër.
Projekti është miratuar nga qeveria që në tetor të vitit 2024, ndërsa në maj 2025 KESH ka nënshkruar me Ministrinë e Infrastrukturës dhe Energjisë kontratën për ndërtimin, shfrytëzimin dhe administrimin e centralit fotovoltaik.
KESH ka marrë gjithashtu miratimin paraprak nga Operatori i Sistemit të Transmetimit për lidhjen e impiantit me rrjetin, si dhe vendimin paraprak për vlerësimin e ndikimit në mjedis. Leja e ndërtimit është dhënë më 3 korrik 2025.
ERE ka vlerësuar se plotësohen kushtet procedurale për nisjen e shqyrtimit të kërkesës për licencim, ndërsa KESH duhet të plotësojë dokumentacionin dhe sqarimet e kërkuara gjatë procesit.
Për shkak se impianti do të vendoset në një nga digat kryesore të sistemit hidroenergjetik shqiptar, ERE ka kërkuar që për nisjen e procedurës të njoftohet edhe Komiteti i Digave të Mëdha, krahas Ministrisë së Infrastrukturës dhe Energjisë.
Projekti synon të kombinojë prodhimin hidroenergjetik të Vaut të Dejës me energjinë diellore, duke shtuar një kapacitet të ri fotovoltaik në një aset ekzistues të KESH-it. /skyweb.al
