Shtetet e Bashkuara kanë shpallur sanksione ndaj dy gjigantëve më të mëdhenj rusë të naftës, Rosneft dhe Lukoil, në përpjekje për të “dobësuar arkën e luftës” së Vladimir Putinit dhe për të mbështetur përpjekjet ndërkombëtare për t’i dhënë fund luftës në Ukrainë.
Sipas Departamentit të Thesarit amerikan, masat synojnë të ndërpresin burimet kryesore të të ardhurave që financojnë makinerinë ushtarake të Kremlinit.
Sekretari amerikan i Thesarit, Scott Bessent, deklaroi se “duke qenë se Presidenti Putin refuzon t’i japë fund kësaj lufte të pakuptimtë, Shtetet e Bashkuara po vendosin sanksione ndaj dy kompanive më të mëdha të naftës që ushqejnë buxhetin e luftës së Kremlinit”.
Ky vendim vjen në një moment kur Uashingtoni kërkon të ushtrojë presion të shtuar ekonomik ndaj Moskës, ndërsa lufta në Ukrainë po hyn në vitin e saj të katërt.
Masat përfshijnë ndalimin e çdo bashkëpunimi tregtar apo financiar me këto kompani dhe ngrirjen e pasurive të tyre në juridiksionin amerikan./skyweb.al
