Google është gjobitur me 403 milionë euro nga autoriteti irlandez për mbrojtjen e të dhënave, pas një hetimi të gjatë mbi mënyrën se si kompania përpunonte të dhënat e vendndodhjes së përdoruesve.
Hetimi, i nisur rreth gjashtë vite më parë pas ankesave të organizatave evropiane të konsumatorëve, shqyrtoi praktikat e Google lidhur me përdorimin e të dhënave të vendndodhjes për qëllime të ndryshme, përfshirë reklamimin e personalizuar dhe analizimin e interesave të përdoruesve.
Autoriteti irlandez arriti në përfundimin se përdoruesit mund të mos jenë informuar në mënyrë të qartë dhe transparente se të dhënat e tyre të vendndodhjes mund të përdoreshin për këto qëllime.
Procedura mbuloi periudhën nga 25 maji 2018 deri më 4 shkurt 2020 dhe përfshiu shqyrtimin e disa shërbimeve të Google, mes tyre aktivitetin në internet dhe aplikacione, historikun e vendndodhjes dhe saktësinë e të dhënave të lokacionit.
Përveç gjobës prej 403 milionë eurosh, autoriteti ka urdhëruar Google që brenda gjashtë muajve të ndryshojë mënyrën e përpunimit të të dhënave, në mënyrë që praktikat e kompanisë të jenë në përputhje me kërkesat e Rregullores së Përgjithshme për Mbrojtjen e të Dhënave (GDPR).
Kjo është një nga gjobat më të mëdha të vendosura nga autoriteti irlandez që prej hyrjes në fuqi të GDPR-së.
Nga ana e saj, Google tha se vendimi lidhet me politika të vjetra, të cilat, sipas kompanisë, janë ndryshuar që në vitin 2019.
Kompania theksoi se përdoruesit kanë sot më shumë kontroll mbi të dhënat e tyre, duke përfshirë mundësinë për të zgjedhur fshirjen automatike të të dhënave pas 3, 18 ose 36 muajsh, si dhe çaktivizimin e reklamave të personalizuara.
Google shtoi se të dhënat e sakta të vendndodhjes në funksionin “Timeline” ruhen tashmë drejtpërdrejt në pajisjen e përdoruesit.
